Қазақстанда жанар-жағармай материалдарын (ЖЖМ) шетелге заңсыз шығаруға қарсы бақылау айтарлықтай күшейтілді.
Соның нәтижесінде шекарада жалпы көлемі 16 мың литрден асатын отынды заңсыз әкетудің 392 әрекетінің жолы кесілді, деп хабарлайды DKNews.kz.
Мұндай шаралар ішкі нарықтағы жанармай қорын сақтау, алыпсатарлықтың алдын алу және заң талаптарының орындалуын қамтамасыз ету мақсатында қолға алынған.
Бақылау тек шекарада ғана емес
Қаржы министрлігінің Мемлекеттік кірістер комитетінің мәліметінше, бақылау бірнеше бағытта қатар жүргізіліп жатыр.
Автомобиль өткізу пункттерінде көліктер мұқият тексерілсе, шекара маңындағы жолдарда мобильді топтар тәулік бойы жұмыс істейді. Сонымен қатар ішкі нарыққа күн сайын мониторинг жүргізіліп, жанармай құю станцияларындағы сатылым көлемі мен шағын мұнай өңдеу зауыттарының қызметі талдануда.
Бақылау күшейтілген уақыттан бері мобильді топтар 122 автоцистернаны тексерген. Кейбір жағдайда жанармайдың заңдылығын анықтау үшін сынамалар алынып, зертханалық сараптамаға жіберілген.
Заңсыз тасымалдаудың ең жиі кездесетін тәсілі қандай?
Комитет мәліметінше, заң бұзушылардың басым бөлігі отынды арнайы жасалған жасырын қосымша бактарға немесе канистрлерге құйып, шекарадан алып өтпек болған.
Осындай әрекеттердің бірі 6 шілдеде Батыс Қазақстан облысындағы «Сырым» автомобиль өткізу пунктінде анықталды. Жүк көлігінің қосымша орнатылған багынан 1,2 мың литр дизель отыны табылып, оны заңсыз алып шығу әрекеті тоқтатылды.
Ал 8 шілдеде Павлодар облысының Железин ауданында мобильді топ «Үрлі-төбе» өткізу пунктіне қарай бара жатқан автокөлікті тоқтатып, ішінде 4 мың литрден астам бензиннің тауарға ілеспе құжаттарсыз тасымалданып жатқанын анықтады.
Комитет төрағасы шекарадағы жағдайды тексерді
Жүргізіліп жатқан жұмыстарды үйлестіру мақсатында Мемлекеттік кірістер комитетінің төрағасы Жандос Дүйсембиев Қазақстан–Өзбекстан мемлекеттік шекарасы учаскесіне жұмыс сапарымен барып, бақылау шараларының ұйымдастырылуын бағалады.
Сапар барысында заңсыз жанармай тасымалына қарсы бақылауды одан әрі күшейту бойынша нақты міндеттер қойылды.
Жанармай құю бекеттері де бақылауда
Жол картасын іске асыру аясында шекара маңындағы жанармай құю станциялары мен шағын мұнай өңдеу зауыттарына да ерекше назар аударылып отыр.
Талдау нәтижесінде 103 хронометраждық зерттеу тағайындалып, қосымша бақылау іс-шаралары жүргізілуде. Бұл жанармай айналымының ашықтығын қамтамасыз етіп, заңсыз схемаларды анықтауға бағытталған.
Бақылау жалғасады
Мемлекеттік кірістер комитеті жанар-жағармай материалдарының заңсыз әкетілуінің жолын кесу жұмыстары алдағы уақытта да жалғасатынын мәлімдеді.
Ведомствоның мәліметінше, қабылданып жатқан шаралар мемлекеттің экономикалық мүдделерін қорғауға, ішкі нарықтағы тұрақтылықты сақтауға және мемлекеттік шекара арқылы тауар қозғалысының ашықтығын қамтамасыз етуге бағытталған.
