Алматыға кіріп-шығатын ең кептелісті бағыттардың бірі жақын арада өзгермек. Президент Қасым-Жомарт Тоқаевтың тапсырмасынан кейін «Алматы – Қаскелең» автожолының ең жүктемелі бөлігі сегіз жолаққа дейін кеңейтіледі, деп хабарлайды DKNews.kz.
Құрылыс жұмыстары 20 шілдеде басталып, жоба 2027 жылдың соңында аяқталуы жоспарланып отыр.
Алматы мен Қаскелең арасындағы жол – күн сайын ондаған мың жүргізуші пайдаланатын негізгі бағыттардың бірі. Әсіресе таңертең және кешкі уақытта бұл учаскедегі ұзын-сонар кептеліс тұрғындардың басты мәселесіне айналған.
Осы жағдайға байланысты Премьер-министр Олжас Бектенов Президент Қасым-Жомарт Тоқаевтың тапсырмаларын іске асыру мәселелері бойынша арнайы кеңес өткізді.
Құрылыс 20 шілдеде басталуы тиіс
Кеңес барысында Премьер-министр Президент тапсырмасының созбалаңға салынбай орындалуы қажет екенін ерекше атап өтті.
«Мемлекет басшысы Алматы қаласы мен оған іргелес елді мекендер тұрғындары тарапынан “Алматы – Қаскелең” жолындағы көлік қозғалысының жоғары жүктемесіне қатысты айтылып жүрген шағымдарға назар аударды. Президент жолды кеңейту жобасын дереу бастау туралы тапсырма берді. Мердігер осы аптаның соңына дейін қажетті техника мен жұмыс күшін жұмылдыруы қажет. Құрылыс жұмыстарын дүйсенбі, 20 шілде күні бастау керек. Мемлекет басшысының тапсырмасы сапалы әрі барынша қысқа мерзімде орындалуы тиіс», — деді Олжас Бектенов.
Сонымен қатар Үкімет басшысы жобаның бекітілген бюджеті өзгермеуі тиіс екенін айтты.
«Жобаны жүзеге асыру мақсатында сатып алынатын жер учаскелеріне қатысты алыпсатарлыққа жол берілмеуі үшін олардың құнын кешегі, 14 шілдедегі жағдай бойынша белгілеу қажет», — деп тапсырды Премьер-министр.
Жол сегіз жолаққа дейін кеңейтіледі
Көлік министрі Нұрлан Сауранбаевтың айтуынша, Алматыдан Қаскелеңге дейінгі автожолдың 8 шақырымдық учаскесі сегіз жолаққа дейін кеңейтіледі.
Жоба Қазақстанның Даму банкі арқылы қаржыландырылады.
Жоспарға сәйкес:
- 8 шақырым жол қайта жаңартылады;
- жол 8 жолаққа дейін кеңейеді;
- 2 жаңа жолайрық салынады;
- 9 жерүсті жаяу жүргіншілер өткелі тұрғызылады.
Осының нәтижесінде жолдың өткізу қабілеті екі есеге дейін артады деп күтілуде.
Құрылыс жұмыстарын толық аяқтап, нысанды пайдалануға беру 2027 жылдың желтоқсан айына жоспарланған.
Алматыға күн сайын 300 мың көлік кіреді
Алматы қаласының әкімі Дархан Сатыбалды келтірген мәліметке сәйкес, мегаполиске тәулігіне шамамен 300 мың автокөлік сырттан кіреді.
Қала ішіндегі көліктерді қосқанда, Алматы көшелеріндегі жалпы қозғалыс көлемі 1 миллионнан асады.
Ал «Алматы – Қаскелең» тас жолымен тәулігіне шамамен 60 мың көлік жүреді. Сондықтан бұл бағыт Алматы агломерациясындағы ең қарқынды жолдардың бірі саналады.
Кеңесте сондай-ақ Абай даңғылын Үлкен Алматы айналма автомобиль жолына (БАКАД) дейін ұзарту жобасы да таныстырылды.
Балама жол салынып жатыр
Алматы облысының әкімі Марат Сұлтанғазиев өңірде көлік ағынын азайтуға бағытталған тағы бір маңызды жобаны таныстырды.
Оның айтуынша, Ұзынағаш ауылынан ұзындығы 32 шақырым болатын балама жолдың құрылысы басталған. Бұл жаңа бағыт болашақта Алматы – Қаскелең тас жолындағы жүктемені айтарлықтай төмендетуге мүмкіндік береді.
Қазіргі уақытта Алматы қаласы мен Алматы облысында осы инфрақұрылымдық жобаларға қатысты жер мәселелерін шешу жұмыстары соңғы кезеңге жеткен.
Агломерацияның көлік жүйесі кешенді жаңарады
Кеңесте тек Қаскелең бағыты ғана емес, Алматы агломерациясының көлік инфрақұрылымын кешенді дамыту мәселесі де қаралды.
Атап айтқанда:
- Алматы – Есік автожолы;
- Алматы – Талғар бағыты;
- рельсті қоғамдық көлік жүйесін дамыту;
- Алматы метрополитенін кеңейту жобалары талқыланды.
Кеңес қорытындысында Олжас Бектенов жауапты мемлекеттік органдарға Алматы агломерациясының көлік байланысын жүйелі түрде жақсарту бойынша нақты тапсырмалар берді.
