Солтүстік Қазақстан облысының Аққайың ауданына қарасты Смирново ауылында жаңғыртудан өткен өрт сөндіру бөлімінің салтанатты ашылу рәсімі өтті. Іс-шараға Төтенше жағдайлар министрі, генерал-лейтенант Шыңғыс Әрінов, облыс әкімі Ғауез Нұрмұхамбетов, жеке құрам, ардагерлер және ауыл тұрғындары қатысты, деп хабарлайды DKNews.kz.
Жаңартылған бөлім Смирново ауылы мен Аққайың ауданындағы 28 елді мекеннің өрт қауіпсіздігін қамтамасыз етеді. Бұл аумақта 17 мыңнан астам адам тұрады.
Құтқарушылар үшін заманауи жағдай жасалды
Салтанатты рәсімде сөз сөйлеген Шыңғыс Әрінов өрт сөндіру бөлімдерін жаңғырту құтқарушылардың қызмет жағдайын жақсартуға бағытталған жүйелі жұмыстың бір бөлігі екенін айтты.
«Соңғы жылдары біз он беске жуық өрт сөндіру депосын заманауи талаптарға сай жаңғырттық. Бүгін бұл жұмыс Солтүстік Қазақстан облысында жалғасуда. Біздің басты міндетіміз құтқарушыларға лайықты қызмет жағдайын жасап, оларды заманауи инфрақұрылыммен қамтамасыз ету. Бұл Мемлекет басшысының тапсырмасы және біз оны әкімдіктермен бірлесіп кезең-кезеңімен жүзеге асырып келеміз. Әрбір аудан орталығы мен әрбір ауылда заманауи өрт сөндіру депосы болуы тиіс. Бұл бағыттағы жұмыс жалғасады», – деді Шыңғыс Әрінов.
Бөлім жаңа техникамен толықты
Іс-шара барысында министр қызметкерлерге жаңа өрт сөндіру, инженерлік және мамандандырылған техниканың кілттерін табыс етті.
Жергілікті атқарушы органның қаржысы есебінен бөлімшенің материалдық-техникалық базасы төмендегі техникамен толықтырылды:
- өрт сөндіру автоцистернасы;
- ТРЭКОЛ қар-батпақ жүргіші;
- вахталық автокөлік;
- жедел-құтқару автомобильдері.
Жобаны іске асыруға үлес қосқан жергілікті атқарушы органдардың өкілдері, құтқарушылар мен кәсіпкерлер Төтенше жағдайлар министрлігінің ведомстволық наградаларымен және облыс әкімінің марапаттарымен марапатталды.
Жаңғырту аясында жаңа инфрақұрылым салынды
Қайта жаңарту барысында нысанға күрделі жұмыстар жүргізілді.
Соның нәтижесінде:
- ғимараттың бір бөлігі қайта салынып, орнына заманауи ангар тұрғызылды;
- газ-түтіннен қорғау қызметінің бекеті ашылды;
- заманауи оқу сыныбы мен диспетчерлік пункт жабдықталды;
- демалыс және жеке құрамды даярлау бөлмелері жасақталды;
- өрт-техникалық құрал-жабдықтарды сақтау және қызмет көрсету аймақтары құрылды.
Қызметкерлердің даярлығы мен демалысына жағдай жасалған
Өрт сөндіру бөлімі аумағында қызметкерлердің кәсіби және дене дайындығына арналған жаңа нысандар да бой көтерді.
Олардың қатарында:
- оқу-жаттығу мұнарасы;
- футбол алаңы;
- абаттандырылған терраса;
- қызметкерлердің демалуына арналған мангал аймағы бар.
Бұл инфрақұрылым құтқарушылардың кәсіби машықтарын жетілдіруге, сондай-ақ тәулік бойы атқаратын қызметтен кейін тиімді демалуына мүмкіндік береді.
Мұның маңызы қандай?
Өрт сөндіру бөлімдерін жаңғырту – өңірлердегі төтенше жағдайларға ден қою жүйесін күшейтудің маңызды бөлігі. Заманауи техникамен және жаңа инфрақұрылыммен жабдықталған бөлімшелердің ашылуы құтқарушылардың жұмыс тиімділігін арттырып, шалғай елді мекендердің қауіпсіздігін қамтамасыз етуге мүмкіндік береді.
