Тобыл өзенінен 113 мың текше метрден астам құм заңсыз өндірілген, деп хабарлайды DKNews.kz.
ҚМА-ның Қостанай облысы бойынша департаменті жер қойнауын заңсыз пайдалану және пайдалы қазбаларды өз бетінше өндіру дерегі бойынша тергеуді аяқтады. Қылмыстық іс сотқа жіберілді.
Құм өзен түбінен өндірілген
Тергеу нұсқасына сәйкес, «СТС-Цемент» ЖШС-нің басшысы мемлекет белгілеп берген жер қойнауы учаскесінің шегінен шығып кеткен.
Өзен құмы Тобылдың арнасы мен жағалауынан өнеркәсіптік көлемде өндірілген. Жұмыс екі жер снарядының көмегімен гидромеханикаландырылған тәсілмен жүргізілген.
Өндірілген құм байланысы бар кәсіпорындарға сатылған.
Жалпы өткізілген құм көлемі 113 мың текше метрден асып, оның құны 719 миллион теңгені құраған.
Өзен арнасы өзгеріп, жағалау бұзылған
Заңсыз өндіріс су және жер ресурстарына елеулі экологиялық зиян келтірген.
ҚМА мәліметінше, Тобыл өзенінің арнасы өзгеріп, жағалау сызығы бұзылған. Гидрологиялық режимге нұқсан келіп, кейбір аумақтар батпақтана бастаған.
Зақым көлемін анықтау үшін ғарыштық түсірілімдер де пайдаланылған.
Суреттерге сәйкес, бүлінген су қоры жерлерінің аумағы 28 мың шаршы метрден асқан. Бұл шамамен төрт футбол алаңының көлеміне тең.
Табиғи кешенді қалпына келтіру үшін өзен арнасын тазарту, жағалауды бекіту және бүлінген жерлерді рекультивациялау қажет.
Күдіктінің мүлкіне тыйым салынды
Сот санкциясымен күдіктіге тиесілі мүлікке тыйым салынған.
Олардың қатарында 12 автокөлік, 10 жер учаскесі және бір тұрғын емес үй-жай бар.
Енді сот заңсыз құм өндіруге қатысты істің мән-жайын және айыпталушының жауапкершілік деңгейін анықтайды.
Қазақстан Республикасы Қылмыстық-процестік кодексінің 201-бабына сәйкес, тергеуге қатысты өзге ақпарат жария етілмейді.
