Су саласындағы мамандар жаңа деңгейде даярланады.
Таразда Қазақстан мен Қытайдың қатысуымен су шаруашылығы саласына арналған бірлескен Оқу орталығы жұмысын бастады, деп хабарлайды DKNews.kz.
Орталық Қазақ су шаруашылығы ғылыми-зерттеу институтының базасында құрылды. Жоба Қазақ су шаруашылығы ғылыми-зерттеу институты мен Қытайдың «Үш шатқал» электр энергетикасы кәсіптік колледжі арасындағы меморандум аясында жүзеге асырылды.
Мамандар Қытай тәжірибесі бойынша оқытылады
Жаңа орталықтың негізгі мақсаты – Қазақстанның су шаруашылығы саласы мамандарын қайта даярлау және олардың біліктілігін арттыру.
Мұнда оқу семинарлары мен тренингтер өткізіліп, мамандар заманауи бағдарламалар бойынша білім алады.
Оқыту мына бағыттарды қамтиды:
- гидротехникалық нысандарды салу;
- су ресурстарын басқару;
- саланы цифрландыру;
- интеллектуалды басқару жүйелерін енгізу.
Бағдарламалар Қытайдың су шаруашылығы саласындағы тәжірибесіне негізделген.
Бірлескен ғылыми жобалар іске асырылады
Оқу орталығында қазақстандық су шаруашылығы кәсіпорындарының сұранысына сай қайта даярлау бағдарламалары әзірленеді.
Сонымен қатар оқытушылар мен сарапшыларды бірлесіп даярлау тетігін қалыптастыру жоспарланып отыр.
Серіктестік тек білім берумен шектелмейді. Тараптар ғылыми зерттеулер жүргізу, жаңа білім беру бағдарламаларын әзірлеу және инновациялық технологияларды енгізу бағытында да жұмыс істемек.
«Меморандум аясында Қазақстан мен Қытайдың білім беру және ғылыми ұйымдары арасындағы ынтымақтастықты одан әрі дамыту көзделген. Атап айтқанда, оқытушылар мен мамандар алмасу, бірлескен ғылыми зерттеулер жүргізу, білім беру бағдарламаларын әзірлеу және өзара алмасу, сондай-ақ су шаруашылығы саласына инновациялық технологияларды енгізу бойынша бірлескен жұмыстар атқару жоспарланып отыр. Бұдан бөлек, Су ресурстары және ирригация министрлігі мен «Үш шатқал» колледжі Қазақ ұлттық су шаруашылығы және ирригация университеті базасында бірлескен колледж құру мәселесін пысықтап жатыр», – деді Су ресурстары және ирригация министрлігінің Ғылым және инновация департаментінің директоры Марат Иманалиев.
Бұл неге маңызды?
Қазақстан үшін су ресурстарын тиімді басқару стратегиялық маңызға ие.
Қытаймен бірлескен оқу орталығының ашылуы сала мамандарының біліктілігін арттырып, заманауи технологияларды енгізуге, ғылыми ынтымақтастықты кеңейтуге және су шаруашылығы жүйесін жаңғыртуға мүмкіндік береді.
