Еліміздің өңірлерінде халықтың тұрмыс сапасын жақсартуға бағытталған жаңа жобалар кезең-кезеңімен жүзеге асырылып жатыр. Газдандыру, ауызсумен қамту, әлеуметтік нысандар ашу, инклюзивті білім беру және туризмді дамыту бағытындағы бастамалар Мемлекет басшысы Қасым-Жомарт Тоқаевтың тапсырмалары аясында жалғасуда, деп хабарлайды DKNews.kz.
Бірқатар өңірде инженерлік инфрақұрылым жаңартылып, жаңа әлеуметтік және туристік нысандар пайдалануға берілді.
Қосшы қаласы толық газдандырылды
Ақмола облысының Қосшы қаласында газдандыру жобасы толық аяқталды.
«Сарыарқа» магистральды газ құбырынан тартылған желінің екінші және үшінші іске қосу кешендері пайдалануға беріліп, қаланың барлық шағын ауданы табиғи газға қосылу мүмкіндігіне ие болды.
Жоба аясында:
- 400 шақырымнан астам газ тарату желісі салынды;
- 1 блокты және 43 шкафты газ реттеу пункті орнатылды;
- шамамен 112 мың тұрғын көгілдір отынға қол жеткізді.
Полтавка ауылына табиғи газ жеткізілді
Ақтөбе облысының Полтавка ауылында табиғи газ іске қосылды.
Құны 581,4 млн теңге болатын жоба аясында:
- 6,4 шақырым газ құбыры тартылды;
- инженерлік инфрақұрылым толық салынды;
- 99 аула мен 316 тұрғын газға қосылды.
Нәтижесінде облысты газбен қамту деңгейі 97,5 пайызға жетті.
Бесағашта жаңа су құбыры пайдалануға берілді
Алматы облысының Бесағаш ауылында 1975 жылы салынған, тозу деңгейі 95 пайызға жеткен су құбыры толық жаңартылды.
Ұзындығы 32 шақырымнан асатын жаңа су желісі іске қосылып, 800-ден астам абонент немесе 3,8 мыңнан астам тұрғын орталықтандырылған ауызсу жүйесіне қосылды.
Сонымен қатар Тұздыбастау ауылында 127 шақырым су құбырын жаңғырту және қосымша трансформаторлар орнату жұмыстары аяқталуға жақын.
Державинскіде Белсенді ұзақ өмір сүру орталығы ашылды
Ақмола облысының Державинск қаласында егде жастағы тұрғындарға арналған Белсенді ұзақ өмір сүру орталығы пайдалануға берілді.
Орталық күніне 30-ға жуық адамды қабылдай алады.
Мұнда:
- жаттығу залы;
- йога аймағы;
- үстел ойындары;
- қолөнер шеберханасы;
- вокал студиясы жұмыс істейді.
Нысан балалар музыка мектебі мен балалар шығармашылығы орталығымен бір ғимаратта орналасқан.
Қарағанды облысында 500 мұғалім арнайы оқытылады
Жыл соңына дейін Қарағанды облысында 500-ге жуық дене шынықтыру пәнінің мұғалімі ерекше білім беру қажеттіліктері бар балалармен жұмыс істеуге арналған бейімделген спорт негіздері бойынша білім алады.
Жоба нәтижесінде өңірдегі әр мектепте арнайы дайындықтан өткен маман болады.
Сонымен қатар бұл курс екі жергілікті колледждің оқу бағдарламасына енгізіледі.
Өңірде бейімделген спорт секциялары мен инклюзивті «Жасыл ел» еңбек жасақтарының жұмысы да кеңейтіліп жатыр.
Баянауылда жаңа визит-орталық ашылды
Павлодар облысының Баянауыл курорттық аймағында заманауи Vizit Bayanaul «Сарыарқа сыры» визит-орталығы ашылды.
Ауданы 740 шаршы метр болатын нысан цифрлық технологиялармен және жасанды интеллект элементтерімен жабдықталған.
Жоба аясында:
- жаңа кіреберіс стеласы орнатылды;
- демалыс аймақтары абаттандырылды;
- туристік инфрақұрылым жаңғыртылды.
Кешенді жұмыстардың нәтижесінде биыл Баянауылға келетін туристер санын 300 мың адамға дейін жеткізу жоспарланып отыр.
Бұл неге маңызды?
Өңірлерде жүзеге асырылып жатқан инфрақұрылымдық және әлеуметтік жобалар тұрғындардың өмір сүру сапасын жақсартуға, инженерлік желілердің сенімділігін арттыруға, әлеуметтік қызметтердің қолжетімділігін кеңейтуге және ішкі туризмді дамытуға мүмкіндік береді.
