Алматы тұрғындарына 2025 жылға арналған мүлік салығы есептеліп болды. Биыл қала бойынша есептелген жалпы сома 4,8 млрд теңгені құрады.
Енді меншік иелеріне ең маңыздысы – төлем мерзімін өткізіп алмау. Себебі уақытында төленбеген салыққа өсімпұл есептеледі, деп хабарлайды DKNews.kz.
Алматы қаласы бойынша Мемлекеттік кірістер департаментінің мәліметінше, есептелген салық сомалары коммуналдық қызметтерге арналған АЛСЕКО түбіртектеріне енгізілген. Сонымен қатар төлем туралы хабарламалар мен шоттар екінші деңгейлі банктердің мобильді қосымшаларында да қолжетімді.
Мүлік салығы қалай есептеледі?
Жеке тұлғалардың мүлік салығы жылжымайтын мүлік орналасқан жер бойынша есептеледі. Есептеу кезінде «Азаматтарға арналған үкімет» мемлекеттік корпорациясының мәліметтері негізге алынады.
Яғни әрбір тұрғынға есептелетін салық мөлшері өзіне тиесілі тұрғын үйдің немесе өзге де жылжымайтын мүлік нысанының сипаттамасына байланысты анықталады.
Кімдерге салықтық жеңілдік қарастырылған?
Қазақстанның Салық кодексінің 597-бабына сәйкес, бірқатар азаматтар үшін 1000 немесе 1500 АЕК көлемінде салықтық жеңілдіктер қарастырылған.
Олардың қатарында:
- Кеңес Одағының Батырлары, Социалистік Еңбек Ерлері, «Халық қаһарманы» және «Қазақстанның Еңбек Ері» атақтарының иегерлері;
- үш дәрежелі Еңбек Даңқы ордені мен «Отан» орденінің кавалерлері;
- Ұлы Отан соғысының ардагерлері, басқа мемлекеттер аумағындағы жауынгерлік іс-қимылдардың ардагерлері және оларға теңестірілген тұлғалар;
- тыл еңбеккерлері;
- мүгедектігі бар азаматтар;
- 18 жасқа дейінгі жетім балалар мен ата-анасының қамқорлығынсыз қалған балалар;
- бала кезінен мүгедектігі бар адамның немесе мүгедектігі бар баланың ата-анасының бірі;
- «Батыр ана» атағын алған және «Алтын алқа» иегері атанған көпбалалы аналар;
- бөлек тұратын зейнеткерлер.
Соңғы мерзім – 1 қазан
Мүлік салығын 2025 жыл үшін 2026 жылдың 1 қазанына дейін төлеу қажет.
Мемлекеттік кірістер департаменті төлемді соңғы күнге қалдырмауға кеңес береді. Себебі мерзімі өткен жағдайда берешек қалыптасып, оған өсімпұл қосылады.
Салықты қайдан тексеруге болады?
Есептелген соманы бірнеше тәсілмен көруге болады:
- АЛСЕКО төлем түбіртектерінен;
- банктердің мобильді қосымшаларынан;
- тұрғылықты жер бойынша аудандық Мемлекеттік кірістер басқармаларынан.
Қосымша ақпарат қажет болған жағдайда азаматтар 1414 Бірыңғай байланыс орталығына хабарласа алады.
Мамандардың айтуынша, төлемді алдын ала жасау бірнеше минут қана уақыт алады, ал бұл кейін артық шығын мен өсімпұлдан сақтануға мүмкіндік береді.
