«Ауыл аманаты» бағдарламасын тиімді іске асыра алмаған өңірлер бюджеттен бөлінген қаражаттан айырылуы мүмкін.
Премьер-министрдің орынбасары Қанат Бозымбаев қаражатты нәтижелі жұмыс істеп жатқан облыстарға қайта бөлу мәселесін қарастыруды тапсырды, деп хабарлайды DKNews.kz.
Түркістан облысында Премьер-министрдің орынбасары Қанат Бозымбаевтың төрағалығымен «Ауыл аманаты» жобасының іске асырылуына арналған республикалық көшпелі кеңес өтті. Жиында бағдарламаның нәтижелері ғана емес, қаржыны игеру қарқыны төмен өңірлердің жұмысы да сынға алынды.
Түркістандағы нәтиже қандай?
2023–2025 жылдары Түркістан облысында 4 223 жоба қаржыландырылып, соның нәтижесінде 4 635 жаңа жұмыс орны ашылды.
Одан бөлек:
- 593 жылыжай салынды;
- 76,8 мыңнан астам ауыл шаруашылығы малы сатып алынды;
- 79 қайта өңдеу кәсіпорны іске қосылды;
- жыл сайын шамамен 80 млрд теңгенің ауыл шаруашылығы өнімі өндірілуде.
Бағдарламаның әлеуметтік тиімділігі де байқалады. Жоба аясында 441 тұрғын атаулы әлеуметтік көмек алушылар қатарынан шыққан.
Ал биыл өңірде 583 жобаны қаржыландырып, 1 234 жаңа жұмыс орнын ашу жоспарланып отыр.
Кейбір облыстар қаржыны игере алмай отыр
Кеңес барысында Үкімет ауыл халқының табысын арттыруға бағытталған мемлекеттік қолдау шаралары жүйелі түрде жалғасатынын атап өтті.
Алайда барлық өңірдің жұмысы бірдей емес.
Бозымбаевтың айтуынша, Ақмола, Атырау және Жамбыл облыстарында бюджет қаражатын игеру деңгейі республика бойынша ең төмен көрсеткіштердің қатарында.
Бұл жағдай өзгермесе, жауапты тұлғаларға қатысты нақты шаралар қабылдануы мүмкін.
«Егер бұл жағдай өзгермесе, тамыз айының қорытындысы бойынша жобаға жауапты саяси мемлекеттік қызметшілерге қатысты тиісті шаралар қаралатын болады. Осыған байланысты Ұлттық экономика министрлігіне қаражатты игеру деңгейі төмен облыстардан жобаны сапалы әрі тиімді іске асырып жатқан өңірлерге қайта бөлу мәселесін қарастыруды тапсырамын. Ал облыс әкімдіктері 2025 жылы "Ауыл аманаты" бағдарламасын іске асыруға бөлінген қаражаттың ағымдағы жылдың тамыз айына дейін толық игерілуін қамтамасыз етуі тиіс», — деді Қанат Бозымбаев.
Қаражат тиімді өңірлерге бағытталуы мүмкін
Бұл тапсырма «Ауыл аманаты» бағдарламасында жаңа тәсілдің енгізіліп жатқанын көрсетеді. Егер кейбір өңірлер бөлінген қаражатты уақытында әрі тиімді пайдалана алмаса, қаржы бағдарламаны нақты нәтижемен жүзеге асырып жатқан облыстарға қайта бөлінуі ықтимал.
Сарапшылардың пікірінше, мұндай қадам мемлекеттік қаржының тиімді жұмсалуын күшейтіп, ауылдағы кәсіпкерлікті дамытуға және жаңа жұмыс орындарын ашуға серпін беруі мүмкін.
