Қазақстанда сайлау күні тұрақты тіркелген мекенжайынан тыс жерде болатын азаматтар дауыс беру құқығынан айырылмайды.
Ол үшін алдын ала есептен шығару куәлігін рәсімдеу қажет, деп хабарлайды DKNews.kz.
Бұл туралы Орталық сайлау комиссиясының отырысында ОСК мүшесі Азамат Айманакумов мәлімдеді.
Өзге елдімекенде қалай дауыс беруге болады?
Егер сайлау күні басқа қалада немесе ауылда болатын болсаңыз, өзіңіз тіркелген сайлау учаскесінен дауыс беру құқығына арналған есептен шығару куәлігін алып, уақытша болатын елдімекенде дауыс бере аласыз.
Бұл құжатты 7 тамыздан бастап 22 тамыз сағат 18:00-ге дейін рәсімдеуге болады. Ол үшін тұрғылықты жеріңіз бойынша тіркелген учаскелік сайлау комиссиясына барып, жазбаша өтініш жазып, жеке куәлігіңізді көрсету жеткілікті.
Куәлік берілгеннен кейін бұл туралы сайлаушылар тізіміне арнайы белгі қойылады.
ОСК қандай маңызды жайттарға назар аудартты?
ОСК мүшесі Азамат Айманакумовтың айтуынша, бұл мүмкіндік барлық жағдайда бірдей қолданылмайды.
«Азаматтар тұрғылықты жері бойынша тіркелген учаскелік сайлау комиссиясынан 7 тамыздан бастап 22 тамыз сағат 18:00-ге дейін дауыс беру құқығына арналған есептен шығару куәліктерін алуға құқылы. Бұл ретте бір елдімекен шегіндегі басқа сайлау учаскесінде дауыс бергісі келетін сайлаушыларға мұндай куәлік берілмейтінін атап өткен жөн. Жоғалған есептен шығару куәліктері қалпына келтірілмейді және олардың телнұсқалары берілмейді», – деді Азамат Айманакумов.
Яғни есептен шығару куәлігі бір қаланың немесе ауылдың ішіндегі басқа учаскеде дауыс беру үшін берілмейді. Ол тек басқа елдімекенде болатын азаматтарға арналған.
Сенімхатпен де алуға болады
Егер сайлаушының өзі келе алмаса, есептен шығару куәлігін сенімхат арқылы алуға мүмкіндік бар.
Маңыздысы – мұндай сенімхатты нотариалды куәландыру талап етілмейді. Бұл азаматтарға құжатты рәсімдеуді жеңілдетеді.
Нені есте сақтау керек?
Сайлау күні қиындыққа тап болмас үшін бірнеше маңызды ережені ескерген жөн:
- есептен шығару куәлігі 7–22 тамыз аралығында ғана беріледі;
- өтініш беру кезінде жеке куәлік қажет;
- жоғалған куәлік қайта берілмейді;
- бір елдімекен ішіндегі басқа учаскеде дауыс беру үшін бұл құжат рәсімделмейді.
Егер сайлау күні жолда немесе басқа өңірде болатыныңыз белгілі болса, құжатты алдын ала алып қойған дұрыс. Сонда өз таңдауыңызды жасау мүмкіндігін жіберіп алмайсыз.
