609 нысан тексерілді. Қазақстанда мүгедектігі бар адамдар мен жүріп-тұруы қиын азаматтар үшін ғимараттар мен инфрақұрылымның қолжетімділігін қамтамасыз етпеген тұлғаларға 47,4 миллион теңгеден астам айыппұл салынды, деп хабарлайды DKNews.kz.
Қазақстан Республикасы Еңбек және халықты әлеуметтік қорғау министрлігі әлеуметтік және көлік инфрақұрылымы нысандарында кедергісіз орта қалыптастыру бойынша бақылауды жалғастырып жатыр.
609 нысан тексерілді
2026 жылдың басынан бері Халықты әлеуметтік қорғау саласындағы реттеу және бақылау комитетінің әлеуметтік инспекторлары 609 нысанды тексерген.
Тексерулердің негізгі мақсаты – мүгедектігі бар адамдар мен жүріп-тұруы қиын азаматтардың ғимараттар мен қызметтерге кедергісіз қол жеткізуіне қатысты заң талаптарының орындалуын анықтау.
Оның ішінде:
- 205 нысан жоспардан тыс тексерілді;
- 291 нысанда профилактикалық бақылау жүргізілді;
- 113 нысан прокуратураның талабы бойынша тексерілді.
Нәтижесінде анықталған заңбұзушылықтарды жою туралы 394 нұсқама берілген.
Заң талаптарын сақтамаған тұлғаларға қатысты 200 әкімшілік айыппұл салынып, олардың жалпы сомасы 47,4 миллион теңгеден асты.
Қандай нысандар тексерілді
Бақылау азаматтар күнделікті пайдаланатын мекемелер мен қоғамдық орындарды қамтыды.
Жыл басынан бері:
- 68 мемлекеттік және квазимемлекеттік ұйым;
- 41 денсаулық сақтау нысаны;
- 127 білім беру ұйымы;
- 280 әлеуметтік қорғау нысаны;
- 4 мәдениет мекемесі;
- 5 спорт нысаны;
- 5 көлік инфрақұрылымы нысаны;
- 5 қоғамдық тамақтану орны;
- 32 сауда нысаны;
- 4 қаржылық қызмет көрсету ұйымы;
- 38 өзге нысан зерделенді.
Инспекторлардың жұмысы тек заңбұзушылықты тіркеумен шектелмейді. Анықталған кедергілерді мүмкіндігінше жедел жоюға да назар аударылады.
Соның нәтижесінде бірқатар нысанда пандустар орнатылып, кіреберістер бейімделіп, тұтқалар мен қолжетімді ортаға қажетті өзге де құрылғылар қойылып жатыр.
Түркістан облысында жоспардан тыс тексерулер өтті
Осындай жұмыстар Түркістан облысында да жүргізілді. Халықты әлеуметтік қорғау саласындағы реттеу және бақылау комитетінің өңірлік департаменті әлеуметтік маңызы бар нысандардың жүріп-тұруы қиын азаматтарға қаншалықты қолжетімді екенін жоспардан тыс тексерді.
Нәтижесінде нысан иелеріне анықталған заңбұзушылықтарды жою жөнінде нұсқамалар берілді. Жауапты тұлғаларға заңнамаға сәйкес әкімшілік ықпал ету шаралары қолданылды.
Түркістан облысының тұрғыны, І топтағы мүгедектігі бар Орынбасар Дастан мұндай тексерулердің күнделікті өмірге нақты әсер ететінін айтты.
«Мен арбамен қозғаламын. Сондықтан қоғамдық орындардың қолжетімді болуының қаншалықты маңызды екенін жақсы білемін. Егер қандай да бір кедергілерге тап болсам, Түркістан облысы бойынша Халықты әлеуметтік қорғау саласындағы реттеу және бақылау комитетінің департаментіне жүгінемін. Мұнда менің өтініштерім жедел қаралады. Тексерулерден кейін көптеген нысанда анықталған кемшіліктер жойылып, пандустар орнатылып, кіреберістер ыңғайластырылып, ғимараттар мүмкіндігі шектеулі жандарға қолайлы бола түседі. Осындай жұмыстардың нәтижесінде бүгінде облысымызда бөгде адамның көмегінсіз өз бетінше кіріп-шыға алатын нысандар саны артып келеді. Бұл бізге қажетті қызметтерді еркін алуға, қоғамдық өмірге белсенді араласуға және қоғамның толыққанды мүшесі ретінде өмір сүруге жол ашады», – деді Орынбасар Дастан.
Бұл неге маңызды
Қолжетімді орта – тек пандус немесе арнайы тұтқа мәселесі емес. Ол адамның медициналық көмек алуына, білім беру ұйымдарына, мемлекеттік мекемелерге, дүкендер мен басқа да қоғамдық орындарға өздігінен кіріп-шығуына тікелей әсер етеді.
Сондықтан талаптардың орындалуы мүгедектігі бар адамдардың күнделікті өмірдегі дербестігін арттырып, қызметтерді өзгелермен тең жағдайда пайдалануына мүмкіндік береді.
Еңбек және халықты әлеуметтік қорғау министрлігі қолжетімді ортаны жетілдіру және заң талаптарының орындалуын бақылау жұмыстары жалғасатынын мәлімдеді. Негізгі мақсат – барлық азамат үшін тең мүмкіндік қалыптастыру.
