Алматыда қала тұрғындары еркін келіп, шахмат ойнай алатын жаңа қоғамдық кеңістік пайда болады.
«31 арнаның» басты ақпараттық бағдарламасы – «Информбюро» 30 жылдық мерейтойына орай қалаға шахмат алаңын сыйға тартпақ, деп хабарлайды DKNews.kz.
Жаңа алаң алматылықтар серуендеп, тынығуды ұнататын Тереңқұрда орналасады. Мұнда кәсіби шахматшылар ғана емес, кез келген тұрғын ойнай алады: жұмыстан немесе оқудан қайтып бара жатып блиц-партия өткізуге, отбасылық турнир ұйымдастыруға немесе алғаш рет кездескен қарсыласпен тақта басында бақ сынасуға мүмкіндік бар.
Телебағдарламаның мерейтойы – қалаға жасалған сый
«Информбюро» эфирге шыққан 30 жыл ішінде Қазақстандағы маңызды оқиғаларды көрерменге жеткізіп, қоғамдағы күрделі мәселелер мен адам тағдырына қатысты тақырыптарды көтеріп келеді.
Мерейтой қарсаңында бағдарлама мерекелік эфирмен шектелмей, Алматыда ұзақ уақыт қызмет ететін қоғамдық кеңістік қалдыруды жөн көрген.
Осылайша, қаланың танымал демалыс орындарының бірінде шахмат әуесқойларын бір жерге жинайтын жаңа алаң пайда болады.
Жобаның ашылуын Қазақстан шахмат федерациясы қолдады.
Алғашқы партияларды гроссмейстерлер ойнайды
Алаңның ашылуы жай ғана салтанатты шарамен шектелмейді.
Балалар мен шахмат әуесқойлары кәсіби спортшылармен бір тақтада ойнап көруге мүмкіндік алады. Арнайы бір мезгілде ойын сеансы ұйымдастырылып, оған Қазақстанның танымал шахматшылары қатысады.
Олардың қатарында әйелдер гроссмейстері, Қазақстанның бірнеше дүркін чемпионы, Дүниежүзілік шахмат олимпиадасының қола жүлдегері, Азия чемпионатының алтын иегері және Қазақстан шахмат федерациясының атқарушы директоры Гүлмира Дәулетова бар.
Сондай-ақ сеансқа Қазақстан тарихындағы ең жас гроссмейстер, 16 жасқа дейінгі жасөспірімдер арасындағы чемпион Эдгар Мамедов қатысады.
Бұл жас шахматшылар үшін кәсіби спортшылардың ойынын сырттай бақылау ғана емес, олармен тікелей тақта басында кездесудің сирек мүмкіндігі болмақ.
«Мұндай кеңістік Алматыға қажет»
Гүлмира Дәулетованың айтуынша, шахмат алаңының ашылуы қала үшін маңызды оқиға. Өйткені мұндай орындар спортты күнделікті өмірдің бір бөлігіне айналдыра алады.
«Алматы үшін мұндай шахмат кеңістігінің пайда болуы – шын мәнінде маңызды оқиға. Қалаға балалар, ата-аналар, әуесқойлар және болашақ чемпиондар үшін шахмат ойыны күнделікті өмірдің бір бөлігіне айналатын орындар аса қажет. Бүгінгі таңда Қазақстанда шахматтың прайм-дәуірі өрлеп тұр: шахмат өнеріне деген қызығушылық артып, жаңа есімдер танылып, олардың халықаралық деңгейде беделі артып келеді. Дәл осындай көзқарас аула мен қала алаңдарынан бастап үлкен кәсіби тақтаға дейінгі бағдарлар болашақ жеңістер үшін берік іргетас болмақ», – дейді Қазақстан шахмат федерациясының атқарушы директоры, әйелдер гроссмейстері Гүлмира Дәулетова.
Соңғы жылдары шахмат Қазақстанда тек кәсіби спорт ретінде ғана емес, балалар мен ересектердің бос уақытын өткізудің танымал тәсілдерінің біріне айналып келеді. Сондықтан қала ортасындағы ашық шахмат алаңы жаңа ойыншылардың да қызығушылығын оятуы мүмкін.
«Бос уақыттың өзі үлкен мүмкіндіктерге жол ашады»
«31 арнаның» бас директоры Айгүл Ақсамбиева жобаның негізгі мақсаты әр жастағы қала тұрғындарын біріктіретін орта қалыптастыру екенін атап өтті.
«Алматы – мәдениет пен идеялар қаласы, онда бос уақыттың өзі үлкен мүмкіндіктерге жол ашады. Шахмат және басқа да зияткерлік ойындар қала тұрғындарының өмірінде ерекше орын алады. Біз жастар мен аға ұрпақты біріктіретін және шабыттандыратын саналы демалыс дәстүрін дамытуға өз үлесімізді қосқымыз келеді», – деді «31 арнаның» бас директоры Айгүл Ақсамбиева.
Жаңа алаңның ерекшелігі де осында: шахмат ойнау үшін алдын ала тіркелудің немесе арнайы турнир күтудің қажеті жоқ. Тақта басында тәжірибелі ойыншы да, шахматқа енді қызығып жүрген бала да кездесуі мүмкін.
Бір партия бірнеше минутқа ғана созылуы ықтимал. Ал кездейсоқ басталған ойын жаңа таныстыққа, тұрақты қарсыластыққа немесе баланың шахматқа деген үлкен қызығушылығына ұласуы мүмкін.
Алматыдағы жаңа кездесу нүктесі
Шахмат – үстел басындағы ойын болғанымен, оның айналасында тұтас орта қалыптасады. Біреу ойнайды, біреу бақылайды, енді бірі келесі партияға кезегін күтеді.
Сондықтан Тереңқұрдағы жаңа алаңның тағы бір міндеті – қала тұрғындары кездесетін, сөйлесетін және уақытын пайдалы өткізетін ашық кеңістікке айналу.
«Информбюроның» 30 жылдық мерейтойы осылайша телеэфирдегі дата ретінде ғана емес, Алматыда қалатын нақты жобамен де есте қалмақ.
Енді Тереңқұрда жаңа партияның басталуы үшін екі ойыншы, шахмат тақтасы және бірнеше бос минут жеткілікті болады.
