Мемлекеттік қызметті үйден алуға болады. 2026 жылдың жеті айында шамамен 1,5 мың қазақстандық «Дербес менеджердің үйге баруы» сервисін пайдаланды. Оның аясында ХҚКО маманы өтініш беруші көрсеткен мекенжайға барып, қажетті мемлекеттік қызметті рәсімдеуге көмектеседі, деп хабарлайды DKNews.kz.
«Азаматтарға арналған үкімет» мемлекеттік корпорациясының мәліметінше, сервис ХҚКО-ға жеке бармай-ақ бірқатар қызметті алуға мүмкіндік береді. Үйге баратын дербес менеджер тарифінің құны — 7 447 теңге.
Алматы дербес менеджер шақыру бойынша көш бастады
2026 жылдың жеті айында дербес менеджердің ең көп сапары Алматы қаласында тіркелген — 296 рет.
Екінші орында Атырау облысы тұр — 277 рет. Қызылорда облысында сервиске 259 рет жүгінген.
Ал 2025 жылы көшбасшылар тізімі өзгеше болған. Ол кезде Қызылорда облысында дербес менеджер қызметін 540 адам пайдаланған, Алматыда — 477, Павлодар облысында — 435.
Жалпы өткен жылы сервиске 2 мыңнан астам адам жүгінген.
7 447 теңгеге маман көрсетілген мекенжайға келеді
Сервисті пайдалану үшін қашықтан өтініш беріп, маман баратын мекенжайды көрсету жеткілікті.
Алдын ала өтініш бойынша фронт-офис маманы клиентке барып, кеңес береді, қажетті құжаттарды қабылдайды және мемлекеттік қызметті сол жерде рәсімдеуге көмектеседі.
7 447 теңге — мемлекеттік баж емес, сервистің қызмет көрсету құны. Яғни мемлекеттік қызмет үшін бөлек төлем көзделсе, ол дербес менеджер тарифіне кірмейді.
Мұндай формат әсіресе түрлі себептермен ХҚКО-ға жеке бара алмайтын азаматтарға ыңғайлы. Сонымен бірге ол уақытты үнемдеп, бірқатар рәсімді үйден немесе алдын ала көрсетілген басқа мекенжайдан өткізуге мүмкіндік береді.
Паспорт пен жеке куәлікті үйде рәсімдеу мүмкін емес
Дербес менеджер арқылы барлық мемлекеттік қызметті алу мүмкін емес.
Сервис арқылы паспорт пен жеке куәлік рәсімделмейді. Мамандандырылған ХҚКО-ларда көрсетілетін қызметтер де бұл тізімге кірмейді.
Себебі мұндай қызметтер үшін азаматтың жеке қатысуы және белгіленген рәсімдерден өтуі қажет.
Қалған қолжетімді қызметтер бойынша дербес менеджер қажетті құжаттарды қабылдап, рәсімдеу процесіне сол жерде көмектесе алады.
Өтінішті «ЦОН» қосымшасы арқылы беруге болады
Дербес менеджердің үйге келуіне өтінішті бірнеше тәсілмен рәсімдеуге болады.
Бірінші жол — «ЦОН» мобильді қосымшасы.
Сондай-ақ өтінішті «Азаматтарға арналған үкімет» мемлекеттік корпорациясының ресми сайтындағы «Азаматтарға көрсетілетін қызметтер» — «Дербес менеджердің үйге баруы» бөлімі арқылы беруге болады.
Тағы бір мүмкіндік — 1414 бірыңғай байланыс орталығына қоңырау шалу.
Өтініш беру кезінде қажетті ақпаратты толтырып, маман келетін мекенжайды көрсету жеткілікті.
Қазақстандықтар үшін таңдау нақты: ХҚКО-ға өздері баруға немесе 7 447 теңге төлеп, дербес менеджерді көрсетілген мекенжайға шақыруға болады.
