Студенттерге 50 орын бөлінді. Алматыда өмірлік қиын жағдайға тап болған кез келген жоғары оқу орнының студенті уақытша тұрып, психологиялық, әлеуметтік және консультациялық көмек ала алатын дағдарыс орталығы жұмысын бастады, деп хабарлайды DKNews.kz.
Орталық Мұхамеджан Тынышпаев атындағы ALT University-дің жаңартылған №1 Студенттер үйінің базасында ашылды. Жоба әзірге бір ай бойы жұмыс істейді.
Орталыққа кез келген ЖОО студенті жүгіне алады
Жаңа орталықтың басты ерекшелігі — көмек тек ALT University білім алушыларымен шектелмейді.
Алматыдағы кез келген жоғары оқу орнының студенті өмірлік қиын жағдайға тап болса, орталыққа жүгіне алады. Осы мақсатта Студенттер үйінен 50 орын бөлінді.
Мұнда:
- уақытша баспанасыз қалған студенттер орналаса алады
- психологиялық қолдау көрсетіледі
- әлеуметтік көмек беріледі
- қажетті консультациялар ұсынылады
- әр өтініш жеке қаралады
- студенттің жағдайы туралы ақпараттың құпиялылығы сақталады
Алматы қаласы Жастар саясаты басқармасы басшысының орынбасары Мирас Нысанәлиевтің айтуынша, жаңа орталық студент жастарды қолдаудың қолданыстағы жүйесін кеңейтуге мүмкіндік береді.
«Алматы – еліміздегі ең ірі студенттік орталық. Сондықтан білім алу үшін қалаға келген әрбір жастың қиын жағдайда жалғыз қалмайтынын сезінуі біз үшін аса маңызды. Студенттер уақытша баспанасыз қалудан бастап, психологиялық немесе әлеуметтік көмек қажет болатын түрлі жағдайға тап болуы мүмкін. Дағдарыс орталығы қай жоғары оқу орнында білім алатынына қарамастан, әр студент қолдау сұрап жүгіне алатын орын болуы тиіс. Біздің міндетіміз – уақытша баспана берумен ғана шектелмей, жастың қиын кезеңнен өтіп, толыққанды оқуына және қалыпты өміріне оралуына көмектесу», — деді Алматы қаласы Жастар саясаты басқармасы басшысының орынбасары Мирас Нысанәлиев.
Жатақхана 487 студентке есептелген
Дағдарыс орталығы Алматыдағы Мәуленов көшесі, 108А мекенжайында орналасқан.
Ол күрделі жөндеуден өткен №1 Студенттер үйінің базасында жұмыс істейді. Жатақхана жалпы 487 орынға есептелген, ал ғимараттың аумағы 7 мың шаршы метрден асады.
Қайта жаңғыртудан кейін Студенттер үйінде:
- жаңартылған тұрғын бөлмелер
- ас үйлер мен тұрмыстық үй-жайлар
- өз бетінше білім алуға арналған кеңістіктер
- демалыс бөлмелері
- кір жуатын орын
- спорт аймағы
- жаттығу залы жабдықталды
Дағдарыс орталығына келген жастар үшін оқу және тұрмыстық аймақтары бар жеке тұрғын бөлмелер қарастырылған.
Сонымен бірге олар асүй модульдерін, санитарлық-гигиеналық үй-жайларды, спорт залын және медициналық пунктті пайдалана алады. Қажет болған жағдайда медициналық пунктте алғашқы көмек көрсетіледі.
Студенттерге тек баспана емес, кешенді көмек көрсетіледі
Орталықтың міндеті студентті уақытша орналастырумен шектелмейді.
Мұнда тұрған кезеңде жастар психологиялық, әлеуметтік және консультациялық қолдау ала алады. Бұл студенттің қиын кезеңнен өтіп, оқу процесіне қайта толыққанды оралуына жағдай жасауға бағытталған.
ҚР Ғылым және жоғары білім министрлігі Жоғары және жоғары оқу орнынан кейінгі білім комитеті төрағасының орынбасары Ақерке Абылайхан мұндай жобалардың студенттерді жан-жақты қолдау жүйесі үшін маңызды екенін айтты.
«Заманауи білім беру ортасы – тек аудиториялар, бағдарламалар мен оқыту сапасы ғана емес. Студенттің қандай жағдайда тұратыны және қиын өмірлік жағдайға тап болғанда қайда жүгіне алатынын білуі де аса маңызды. Түрлі жоғары оқу орнының студенттеріне қолжетімді дағдарыс орталығының ашылуы – осындай қолдау жүйесін дамытудағы маңызды қадам. Мұнда жастар уақытша баспана, консультациялық, әлеуметтік және психологиялық көмек алып, ең бастысы, оқуын алаңсыз жалғастыруға мүмкіндік алады», — деді Ақерке Абылайхан.
Неліктен бұл маңызды
Алматы — Қазақстандағы студенттер ең көп шоғырланған қалалардың бірі. Басқа өңірлерден білім алуға келген жастар үшін баспана мәселесі немесе күтпеген әлеуметтік қиындық оқуын жалғастыруға тікелей әсер етуі мүмкін.
Жаңа орталық осындай жағдайда жедел көмек көрсететін қосымша тетікке айналмақ. Оның форматы бір жерде бірнеше мәселені шешуге мүмкіндік береді: уақытша баспана беру, психологиялық қолдау көрсету, әлеуметтік бейімдеуге көмектесу және студенттің оқуын үзбеуіне жағдай жасау.
Ең бастысы, орталықтың қызметі нақты бір университетпен шектелмейді. Алматыдағы кез келген ЖОО студентінің көмек сұрай алуы жобаның қалалық деңгейдегі әлеуметтік маңызын арттырады.
