Қорғаныс министрлігінде кадрлық өзгеріс болды. Президент Қасым-Жомарт Тоқаев Дархан Ахмедиевті Қазақстан Республикасы Қорғаныс министрінің орынбасары қызметінен босатты, деп хабарлайды DKNews.kz.
27 тамызда жарияланған Ақорданың ресми өкімінде оның қызметтен босатылғаны хабарланды.
Дархан Ахмедиев бұл қызметті төрт жылдан астам атқарды
Ақорда жариялаған құжатта шешімнің себебі көрсетілмеген.
«Мемлекет басшысының өкімімен Ахмедиев Дархан Мейрамұлы Қазақстан Республикасы Қорғаныс министрінің орынбасары қызметінен босатылды», — делінген хабарламада.
Дархан Ахмедиев Қорғаныс министрінің орынбасары қызметіне 2022 жылғы сәуірде тағайындалған. DKNews.kz сол кезде оның Қорғаныс министрінің орынбасары болып тағайындалғаны туралы жазған еді.
Осылайша, ол бұл лауазымда төрт жылдан астам жұмыс істеді.
Ахмедиев армияны цифрландыру бағытына жауап берді
Дархан Ахмедиев Қорғаныс министрлігінде цифрландыру бағытымен айналысты. Оның қызметі кезінде әскери есепке алу, әскерге шақыру және Қарулы күштердегі бірқатар процесті цифрлық форматқа көшіру жобалары іске асырылды.
2023 жылы ол әскери комиссариаттардағы дәстүрлі тіркеу рәсімін проактивті форматқа ауыстыру туралы айтқан. Бұл жүйе азаматтардың әскери комиссариатқа жеке бару қажеттілігін қысқартуға бағытталды. Сол кезде жыл сайынғы үнем 1 млрд теңгеден асатыны хабарланған.
Қорғаныс министрлігінде «Срочники 2.0», әскери қызметшінің жеке кабинеті және әскери есепті автоматтандыруға арналған ақпараттық жүйелер де енгізілді.
«Smart военкомат» әскери есеп жүйесін өзгертті
2025 жылы Ахмедиев «Smart военкомат» жобасының мүмкіндіктерін таныстырған болатын. Жоба әскери есеп пен мерзімді қызметке шақыру кезінде мемлекеттік органдар арасындағы деректер алмасуды автоматтандыруға бағытталған.
Жүйеге медициналық куәландыруды цифрландыруға арналған «е-Медосмотр» сервисі де кірді.
Ахмедиевтің түсіндіруінше, цифрлық жүйелер азаматтарды тіркеуден бастап әскери қызметке жарамдылығы туралы шешім қабылдауға дейінгі процестерді автоматтандыруға мүмкіндік берген.
Жасанды интеллект пен киберқауіпсіздікке басымдық берілді
Соңғы жылдары Қорғаныс министрлігінің цифрлық бағыты жасанды интеллект пен киберқауіпсіздікке қарай кеңейді.
2025 жылы Ахмедиевтің жетекшілігімен IT-мамандармен кездесу өтіп, Қарулы күштердің киберқауіпсіздік кеңесін құру және қорғаныс ведомствосы мен IT-қоғамдастық арасындағы өзара іс-қимылдың жол картасын әзірлеу мәселелері талқыланды. Бұл туралы DKNews.kz Қазақстан армиясына арналған «цифрлық қалқан» жобасы туралы материалында жазды.
Әскери саладағы технологиялық жобалар бұдан кейін де жалғасты. 2026 жылы өткен Shaiqas чемпионатында ұшқышсыз аппараттар, робототехника және киберқауіпсіздық бағыттарындағы әзірлемелер көрсетілді. Қатысушыларды Қорғаныс министрінің цифрландыру жөніндегі орынбасары ретінде Дархан Ахмедиев қарсы алған еді.
Қорғаныс саласына келгенге дейін IT бағытында жұмыс істеді
Ахмедиевтің Қорғаныс министрлігіне дейінгі еңбек жолы да цифрландырумен байланысты.
Ол 2012 жылы «Ұлттық ақпараттық технологиялар» АҚ-да аналитик болып еңбек жолын бастаған. Кейін Төтенше жағдайлар министрлігінде, мемлекеттік қызмет және сыбайлас жемқорлыққа қарсы іс-қимыл саласындағы мемлекеттік органда жұмыс істеді.
2017–2019 жылдары Қорғаныс және аэроғарыш өнеркәсібі министрлігінде басқарма басшысы қызметін атқарды.
2019 жылы Цифрлық даму, инновациялар және аэроғарыш өнеркәсібі министрлігінің Электрондық өнеркәсіпті дамыту департаменті директорының орынбасары болды.
2020 жылы IT дамыту департаментінің директоры, кейін Ақпараттық және ақпараттық-коммуникациялық технологияларды дамыту департаментінің директоры қызметін атқарды.
2022 жылғы сәуірде ол Қорғаныс министрінің орынбасары болып тағайындалды.
Оның соңғы бағыттарының бірі инженерлік технологиялар болды
Ахмедиев қызметінен босатылардан аз уақыт бұрын қорғаныс саласындағы жаңа технологиялар мен инженерлік кадрларды дамыту мәселелеріне қатысып жүрді.
DKNews.kz бұған дейін Shaiqas-2026 чемпионатында армияға арналған дрондар, робототехника және киберқауіпсіздік шешімдері көрсетілгенін жазған болатын. Іс-шарада Дархан Ахмедиев жас инженерлерді елдің қорғаныс саласы үшін маңызды кадрлық резерв ретінде атаған.
27 тамыздағы Президент өкімінде Ахмедиевтің қызметтен босатылу себебі немесе оның орнына кім тағайындалатыны туралы ақпарат көрсетілмеген.
