Ауруханалардағы бақылау күшейтіледі.
Қазақстанның Денсаулық сақтау министрлігі барлық медициналық ұйымдарда, меншік түріне қарамастан, ішкі инфекциялық аудитті міндетті етуге дайындалып жатыр, деп хабарлайды DKNews.kz.
«Ішкі инфекциялық аудит жүргізу қағидаларын бекіту туралы» бұйрық жобасы әзірленіп, қазір келісу және мемлекеттік тіркеу рәсімдерінен өтіп жатыр.
2025 жылы инфекцияларды тіркеу деңгейі 1,41 есе өсті
Бақылауды күшейтуге медициналық көмек көрсетуге байланысты инфекциялардың көбеюі себеп болып отыр.
Денсаулық сақтау министрлігінің дерегінше, 2025 жылы Қазақстанда медициналық көмек көрсетуге байланысты инфекцияларды тіркеу деңгейі 2024 жылмен салыстырғанда 1,41 есе артқан.
Мұндай жағдайлар ең көп босандыру ұйымдарында тіркеледі. Бұл мекемелерде іріңді-септикалық инфекциялар жиі анықталады.
Мәселе тек Қазақстанға тән емес. Дүниежүзілік денсаулық сақтау ұйымының дерегіне сәйкес, әлемде медициналық көмек алған әрбір оныншы пациент инфекция жұқтырады. Ал шамамен 1,4 миллион адам бір мезетте осындай инфекциялардан ем қабылдайды.
Талап жеке клиникаларға да қатысты болады
Жаңа ереженің басты өзгерісі — ішкі инфекциялық аудиттің барлық медициналық ұйым үшін міндетті болуы.
Бұл талап мемлекеттік ауруханалармен қатар жеке клиникаларға да таралады.
Аудиттің қаншалықты жиі жүргізілетіні медициналық ұйымның бейініне, эпидемиологиялық жағдайға және бұған дейінгі тексерулердің нәтижесіне қарай анықталады.
Қосымша эпидемиологиялық қауіп туындаса, жоспардан тыс аудит өткізу қарастырылған.
Қол жуудан құралдарды стерилизациялауға дейін тексереді
Ішкі аудит кезінде медициналық ұйымдар инфекциялық қауіпсіздік талаптарының іс жүзінде қалай орындалып жатқанын жүйелі түрде бағалайды.
Тексеру барысында:
- медицина қызметкерлерінің қол гигиенасын сақтауы;
- асептика және антисептика талаптарының орындалуы;
- медициналық бұйымдарды дезинфекциялау және стерилизациялау сапасы;
- жеке қорғаныш құралдарын пайдалану;
- хирургиялық және жоғары қауіп тобына жататын бөлімшелердегі инфекцияның алдын алу;
- медициналық процедуралардың қауіпсіздігі;
- медициналық қалдықтармен жұмыс істеу;
- қызметкерлерді инфекциялық қауіпсіздік талаптарына оқыту қаралады.
Яғни бақылау инфекция тарауы ықтимал барлық негізгі кезеңді қамтиды: медицина қызметкерінің қол гигиенасынан бастап құралдарды өңдеу мен медициналық қалдықтарды жоюға дейін.
Бұзушылық анықталса, жауаптылар мен мерзім белгіленеді
Аудит тек кемшіліктерді анықтаумен шектелмейді.
Егер медициналық көмек көрсетуге байланысты инфекциялардың алдын алу жөніндегі комиссия заңбұзушылық немесе талапқа сай келмейтін жағдайларды анықтаса, нақты түзету шараларын әзірлейді.
Оларды орындау мерзімі мен жауапты тұлғалар белгіленеді.
Одан кейін қабылданған шаралардың орындалуы мен тиімділігі қайта тексеріледі.
Бұл тәсіл инфекция тіркелгеннен кейін ғана әрекет етуден гөрі, қауіп туындайтын тұстарды алдын ала анықтауға бағытталған.
Антибиотикке төзімді микроорганизмдерге ерекше бақылау енгізіледі
Жаңа қағидаларда дәрілік препараттарға бірнеше бағыт бойынша төзімді микроорганизмдердің таралуына ерекше назар аударылған.
Мұндай инфекциялар пациенттің ауруханада ұзағырақ жатуына, қосымша антибиотик қабылдауына, зертханалық тексерулерден қайта өтуіне және қосымша медициналық араласуларға әкелуі мүмкін.
Бұл денсаулық сақтау жүйесінің шығынын да арттырады.
Қағидалар жобасы Дүниежүзілік денсаулық сақтау ұйымының ұсынымдарын ескере отырып әзірленген. Министрлік жаңа жүйе ауруханаішілік инфекциялардың таралу қаупін азайтып, медициналық ұйымдардағы ішкі бақылауды күшейтеді деп күтеді.
