Елдегі тұрғын үй қоры қайта есепке алынады.
Бірыңғай базаға тек көпқабатты үйлер ғана емес, екі және төрт пәтерлі шағын үйлер де енгізіліп, олардың техникалық жағдайы, лифтілері мен есепке алу аспаптары туралы мәліметтер жинақталады, деп хабарлайды DKNews.kz.
Ауқымды түгендеу жұмыстары «Тұрғын үй қатынастары туралы» заңды орындау және энергетикалық әрі коммуналдық секторларды жаңғырту жөніндегі ұлттық жоба аясында жүргізіледі.
Тізілімге екі пәтерлі үйлер де кіреді
Түгендеудің ауқымы көппәтерлі үй туралы қалыптасқан түсініктен әлдеқайда кең.
Есепке үйдің қабат санына, меншік иелерінің санына, кондоминиум нысанының тіркелуіне немесе басқару нысанының таңдалуына қарамастан барлық тиісті ғимараттар алынады.
Соның ішінде ауылдық елді мекендердегі екі және төрт пәтерлі үйлер, сондай-ақ басқару нысаны әлі анықталмаған үйлер де бірыңғай базаға енгізіледі.
«Тұрғын үй қатынастары туралы» заңның 2-бабына сәйкес, көппәтерлі тұрғын үй деп кондоминиум нысанының ортақ мүлкінен және екі немесе одан да көп пәтерден не тұрғын емес үй-жайдан тұратын жеке тұрған ғимарат танылады.
Әр үйге бірыңғай цифрлық код бекітіледі
Тізілімдегі негізгі сәйкестендіргіш — мекенжайдың тіркеу коды, яғни МТК болады.
Осы код арқылы нақты үйге оның техникалық сипаттамалары, пәтерлер мен тұрғын емес үй-жайлардың саны, басқару нысаны, лифтілердің жай-күйі, коммуналдық желілерге қосылуы және есепке алу аспаптары туралы мәліметтер байланыстырылады.
Нәтижесінде әртүрлі ұйымдарда бөлек сақталып келген деректер бір нысанның айналасына біріктіріледі.
Бұл мемлекеттік органдарға күрделі жөндеу, техникалық тексеру, коммуналдық инфрақұрылымды жаңғырту және лифтілерді ауыстыру кезінде нақты мәліметтерге сүйенуге мүмкіндік береді.
Меншік иелерінің ЖСН-ы мен қарызы жиналмайды
Түгендеу азаматтардың жеке деректеріне емес, үйлердің өзіне және олардың техникалық сипаттамаларына қатысты жүргізіледі.
Меншік иелерінің аты-жөні, жеке сәйкестендіру нөмірі, құқық белгілейтін құжаттар туралы мәліметтер және коммуналдық берешек инвентаризация аясында жиналмайды.
Ал тізілімге қажетті техникалық және басқарушылық деректер бірнеше көзден түседі. Олардың қатарында жергілікті атқарушы органдар, табиғи монополия субъектілері, мүлік иелерінің бірлестіктері, меншік иелері кооперативтері және басқа да басқару субъектілері бар.
Ақпарат жинауды облыс әкімдіктері аудандар мен облыстық маңызы бар қалалардың тұрғын үй инспекциялары арқылы ұйымдастырады.
Жұмыс нысандары МИБ-терге, тікелей бірлесіп басқару нысанындағы үйлердің өкілдеріне, басқарушы ұйымдарға және коммуналдық қызмет көрсетушілерге жіберіледі.
Тізілім күрделі жөндеу мен лифт ауыстыруға негіз болады
Жаңа базаның басты практикалық мәні — жөндеу мен жаңғыртуға мұқтаж үйлерді нақты анықтау.
Тізілім арқылы күрделі жөндеуді қажет ететін үйлердің тізімі жасалып, лифтілерді ауыстыру қажеттілігі, есепке алу аспаптарымен қамтылу деңгейі және өңірлердегі коммуналдық желілерді жаңғырту көлемі нақты деректер негізінде есептелмек.
Бұл сондай-ақ МИБ, ПИК және басқарушы компаниялардың атқарушылық құжаттамасын жүргізуді реттеуге және коммуналдық төлемдерді есептеу кезінде пайдаланылатын бастапқы деректердің дұрыстығын арттыруға бағытталған.
Түгендеу энергетикалық және коммуналдық инфрақұрылымды жаңғырту жөніндегі ауқымды жұмыстармен қатар жүргізіліп жатыр. Ұлттық жоба аясында елдегі коммуналдық және энергетикалық активтерді кезең-кезеңімен жаңарту көзделген.
Бұған дейін біз Қазақстанда тұрғын үйлер мен коммуналдық инфрақұрылымды жаңғырту аясында ескі лифтілерді ауыстыру және көппәтерлі үйлерді жөндеу жұмыстары қалай жүргізіліп жатқаны туралы жазған едік.
