Қазақстан бір айға AI алаңына айналады. 23 қыркүйекте басталатын AI MONTH 2026 хакатондардан бастап инвестиция, киберқауіпсіздік, медицина, робототехника және киноға дейінгі технологиялық бастамаларды бір бағдарламаға жинайды, деп хабарлайды DKNews.kz.
Басты оқиға 1–3 қазанда Астанада өтетін AI & Digital Bridge 2026 халықаралық форумы болмақ. Бұған дейін жарияланған бағдарламада форумның технологиялық компанияларды, инвесторларды, стартаптар мен әзірлеушілерді біріктіретіні көрсетілген.
AI Week енді бір айлық бағдарламаға айналды
2026 жылы бұрынғы AI Week форматы AI MONTH болып өзгерді. Себебі жасанды интеллектке қатысты бастамалар саны артып, технологиялық күн тәртібі Астанадағы бірнеше күндік шараның шеңберінен шығып отыр.
Енді бағдарлама бизнес пен стартаптарды ғана емес, білім беру, медицина, киберқауіпсіздік, робототехника, кино және өңірлік технологиялық қауымдастықтарды да қамтиды.
AI MONTH Астанамен шектелмейді. Өңірлік технологиялық хабтарда воркшоптар, буткемптер, хакатондар, мансаптық кездесулер, питч-сессиялар мен стартап-батлдар өткізу жоспарланған.
Мектеп оқушылары мен студенттерден бастап әзірлеушілер, кәсіпкерлер және дайын жобасы бар стартап командаларына дейін қатыса алады.
$1,1 млн ресурсы бар HackAlem AI айды ашады
AI MONTH-тың алғашқы ірі оқиғасы 23 қыркүйекте басталады. Бағдарламаны OpenAI қолдауымен ұйымдастырылатын HackAlem AI хакатоны ашады.
Үш адамға дейінгі командалар Қазақстан экономикасының 10 негізгі саласына арналған агенттік AI шешімдерін әзірлейді. Қатысушылар Codex пен OpenAI API құралдарын міндетті түрде қолданады.
Хакатонның ақшалай жүлделері мен технологиялық ресурстарының жалпы көлемі $1,1 млн деп көрсетілген. Бұл сомаға жүлде қоры, API-токендер және AI өнімдерін әзірлеуге әрі іске қосуға арналған OpenAI технологиялық ресурстары кіреді.
Мұндағы негізгі талап дайын презентация жасаудан күрделірек: командалар қысқа мерзім ішінде идеяны жұмыс істейтін AI шешіміне жеткізуі керек.
Жеңімпаздар AI & Digital Bridge 2026 форумының негізгі сахнасында марапатталады.
Киберқауіпсіздік пен C5+1 жеке алаңға шығады
29–30 қыркүйекте Астанада Орталық Азиядағы киберқауіпсіздік мәселелеріне арналған KazHackStan халықаралық конференциясы өтеді.
100-ден астам өңірлік және халықаралық спикер DevSecOps, OSINT, деректерді қорғау, зиянды бағдарламаларды талдау және жасанды интеллект дамуына байланысты жаңа киберқауіптерді талқылайды.
Осы күндері C5+1 алаңы да жасанды интеллект тақырыбына ауысады. Орталық Азия мемлекеттері мен АҚШ арасындағы диалогта AI реттеу, технологиялық инфрақұрылым, мамандар даярлау және халықаралық әріптестік мәселелері қарастырылмақ.
Бұл AI MONTH бағдарламасының технология әзірлеумен ғана шектелмейтінін көрсетеді. Жасанды интеллектіні кім және қалай реттейді, оған қандай инфрақұрылым қажет және жаңа қауіптерге қалай жауап беру керек деген мәселелер де күн тәртібіне енгізілген.
Инвесторлар мен стартаптар бір алаңда кездеседі
AI MONTH-тың жеке бағыты венчурлік капиталға арналған. LP Summit Еуразиядағы институционалдық инвесторларды, венчурлік және ұлттық қорларды, корпорациялар мен family office өкілдерін жинайды.
Ал AI & Digital Bridge аясындағы стартап бәсекелерінде нақты қаржылық ынталандыру да бар.
Мәселен, Astana Hub Battle 2026 жүлде қоры $100 мыңды құрайды. 50 команда 2 қазанда жартылай финалда бақ сынап, олардың 14-і 3 қазанда негізгі сахнадағы финалға өтеді.
Қазақстандық стартаптар үшін тағы бір мүмкіндік — халықаралық нарыққа шығу. Бұған дейін AI & Digital Bridge аясында Draper Founders Challenge арқылы он финалистің арасынан үш команда таңдалып, олардың өкілдеріне Калифорниядағы Draper University экожүйесіне кіру мүмкіндігі берілетіні жарияланған.
AI медицинаға, роботтарға және киноға кіреді
Бағдарламада жасанды интеллекттің нақты салаларда қолданылуына арналған бірнеше бөлек бағыт бар.
AI and MedTech Day кезінде дәрігерлер, әзірлеушілер, сарапшылар мен стартаптар диагностикада және денсаулық сақтауды басқаруда AI қолдануды талқылайды.
Робототехника бағыты бұдан да практикалық форматта өтеді. Unitree хакатонында командалар ұйымдастырушылар берген Unitree G1 гуманоидты роботтарын бағдарламалайды. Қатысушылар практикалық тапсырмаларды симуляторсыз орындауы керек.
1–3 қазанда Astana AI Film Festival өтеді. Онда жасанды интеллект режиссура, визуалды стиль, сторителлинг, кейіпкерлер жасау, арнайы эффектілер және дыбыстау құралы ретінде қарастырылады.
Бағдарламаға AI көмегімен түсірілген фильмдердің көрсетілімдері, кәсіби пікірталастар мен воркшоптар енгізілген.
Балалар үшін робототехника, жастар үшін AI болашағы талқыланады
AI MONTH бағдарламасына FIRST Tech Challenge және FIRST LEGO League халықаралық робототехника жарыстары да кірді.
UNICEF жеке форсайт-сессия өткізіп, жасанды интеллекттің балалар мен жастардың болашағына ықпалын талқылайды.
Осы арқылы AI MONTH аудиториясы кәсіби әзірлеушілер шеңберінен шығады. Бір бағдарламада мектеп оқушысы робот құрастыра алады, студент хакатонға қатысады, стартап инвестор іздейді, ал компания AI өнімін бизнеске енгізудің жолдарын қарастырады.
AI & Digital Bridge 1–3 қазанда өтеді
AI MONTH-тың орталық оқиғасы — AI & Digital Bridge 2026.
Форум 1–3 қазан аралығында Астанада өтеді. Ашық бағдарлама 2–3 қазанға жоспарланған. Бұған дейін жарияланған мәлімет бойынша, 1 қазан жоғары деңгейдегі арнайы бағдарламаға бөлінген және оған қатысу арнайы шақыру арқылы жүзеге асырылады.
Форумның негізгі тақырыптары жасанды интеллект, технологиялық кәсіпкерлік, инвестициялар, адами капитал және цифрлық экономика болады.
AI & Digital Bridge 2026-ны Қазақстан Республикасының Жасанды интеллект және цифрлық даму министрлігі, Astana Hub және Астана қаласының әкімдігі ұйымдастырады.
Бір айдың соңында үздік AI жобалар анықталады
AI MONTH Grand Final alem.ai Battle финалымен аяқталады.
Astana Hub ұйымдастыратын жарыста Қазақстан мен Орталық Азиядан келген командалар мен жас таланттар төрт санат бойынша өз әзірлемелерін таныстырады.
Осылайша 23 қыркүйекте хакатоннан басталатын бағдарлама бір тізбекке құрылған: AI үйрену, өнім әзірлеу, оны инвесторға көрсету, технологиялық бизнесті дамыту және халықаралық серіктес іздеу.
2026 жылдың Қазақстанда Цифрландыру және жасанды интеллект жылы болып жариялануы бұл бағдарламаның мемлекеттік технологиялық күн тәртібімен тікелей байланысын күшейтеді.
Бұған дейін біз AI & Digital Bridge 2026 бизнеске қандай мүмкіндіктер беретінін егжей-тегжейлі жазған едік. Форумда стартаптар үшін инвестиция, халықаралық нарыққа шығу және $100 мыңдық Astana Hub Battle бәсекесі қарастырылған.
