Жоба тағы бірнеше өңірді қамтымақ. Қазақстан мен ЮНИСЕФ балалар мен жастар арасында су үнемдеу мәдениетін қалыптастыратын «Су және білім» жобасын Түркістан облысына, кейін Каспий маңы өңірлеріне кеңейтуді жоспарлап отыр. Жастар енді тек білім алып қоймай, су саласына арналған стартаптар мен практикалық шешімдер әзірлеуге де қатысады, деп хабарлайды DKNews.kz.
Бұл мәселені Су ресурстары және ирригация вице-министрі Аслан Абдраимов пен ЮНИСЕФ-тің Қазақстандағы өкілі Рашед Мұстафа Сарвар талқылады.
Түркістаннан кейін Ақтау мен Атырау қамтылуы мүмкін
«Су және білім» жобасы Су ресурстарының ақпараттық-талдау орталығы және Оқу-ағарту министрлігімен бірлесіп жүзеге асырылып келеді.
ЮНИСЕФ жобаны алдымен Түркістан облысына кеңейтуге қолдау көрсетуге дайын. Келесі кезеңде Каспий маңы өңірлерін, оның ішінде Ақтау мен Атырауды қамту қарастырылып отыр.
Өңірлерді кеңейту жобаның келесі кезеңіндегі жалғыз өзгеріс емес. Тараптар оны алдағы екі жылға арналған ұзақ мерзімді форматқа көшіруге келісті.
Бұл ретте су үнемдеу мәдениетін қалыптастыруға арналған ортақ тұжырымдама әзірлеу жоспарланған.
Жастар су саласына арналған стартаптар жасайды
Жобаның практикалық бөлігі күшейтілмек.
ЮНИСЕФ өзінің еріктілер қозғалысы мен жоғары оқу орындарының жанындағы хабтарды осы жұмысқа тартуды ұсынып отыр. Жасөспірімдер мен жастар су ресурстарын ұқыпты пайдалану туралы білім алумен шектелмейді.
Олар:
- су саласындағы стартаптар әзірлейді;
- суды үнемдеуге арналған шешімдер ұсынады;
- практикалық бастамаларға қатысады;
- еріктілер желісі арқылы өңірлердегі жобаларға қосылады.
Бұл тәсіл экологиялық білімді күнделікті дағдымен және нақты технологиялық шешімдермен байланыстыруға мүмкіндік береді.
Су үнемдеу мәдениетін ұлттық қозғалысқа айналдырмақ
Су ресурстары және ирригация министрлігі жобаның ауқымын жекелеген білім беру іс-шараларынан кеңірек қарастырып отыр.
«Біздің міндетіміз – жинақталған тәжірибені жүйелі әрі ұзақ мерзімді жұмысқа айналдыру. Су саласының өңірлік құрылымын ЮНИСЕФ-тің еріктілер желісімен біріктіре отырып, су үнемдеуге бағытталған ұлттық қозғалыс қалыптастыра аламыз. Бұл қозғалыстың негізгі қозғаушы күші жасөспірімдер мен жастар болады», — деді Аслан Абдраимов.
Мұнда негізгі екпін суды үнемдеу туралы ақпарат таратуға ғана емес, жастарды нақты жобаларға қатыстыруға түсіп отыр.
Пилоттық жоба мектептерде іске асырылып жатыр
«Су және білім» бастамасының тәжірибесі қазірдің өзінде Қызылорда облысындағы 10 пилоттық мектепте қолданылып келеді. Жоба ЮНИСЕФ, Француз даму агенттігі және Халықаралық Аралды құтқару қоры Атқарушы комитетінің қолдауымен жүзеге асырылуда.
Мектептерде су үнемдеу элементтері енгізіліп, су клубтары құрылған, дебаттар мен шығармашылық байқаулар ұйымдастырылған. Оқушылар су ресурстарына қатысты ғылыми жобалармен де айналысады.
Ендігі мақсат — осы тәжірибені бірнеше өңірге таратып, мектеп, жоғары оқу орны, еріктілер қозғалысы және су саласының өңірлік құрылымдарын бір жүйеге біріктіру.
Қазақстанда су үнемдеу мәдениетін білім беру арқылы қалыптастыру жұмысы бұған дейін де кеңейтілген. Ресми мәлімет бойынша, ЮНИСЕФ қолдауымен ұйымдастырылған экологиялық сабақтар 19 жоғары оқу орнын, 100 колледжді және 2,5 мың мектепті қамтыған. Бұған дейін біз оқушылар әзірлеген суды үнемдейтін күн энергиясымен жұмыс істейтін суару жүйесі туралы жазған едік.
