Жол жөндеу нақты диагностикаға сүйенбек. Қазақстанда жергілікті автомобиль жолдарын жоспарлау, жобалау, салу және күтіп ұстауды бір жүйеге біріктіретін тәсіл әзірленіп жатыр, деп хабарлайды DKNews.kz.
Астанада басталған үш күндік республикалық семинар-кеңестің қорытындысы бойынша өңірлердегі жол сапасын арттыруға арналған алдағы үш жылдық жұмыс жоспарын қалыптастыру көзделген. Онда нақты шаралармен бірге жауапты тұлғалар мен орындау мерзімдері белгіленеді.
Жолды жөндеу қажеттілігі диагностикамен анықталады
«Сапалы жолдар: жоспарлаудан пайдалануға дейін» семинарының негізгі бағыттарының бірі — өңірлердегі жол жұмыстарын жоспарлау тәртібін өзгерту.
Басым учаскелер жолдың нақты жағдайы мен диагностика нәтижелері негізінде айқындалмақ. Жөндеу түрлерін де жолдың қазіргі жай-күйіне қарай нақты ажырату көзделіп отыр.
«Үш күн ішінде қатысушылар жолдарды жоспарлау, жобалау, құрылыс-монтаж жұмыстары, сапаны бақылау, пайдалану және жол желісін цифрландыру мәселелерін қарастырады. Негізгі назар жергілікті жолдардағы нақты проблемалар мен оларды шешу жолдарына аударылады», – деді Көлік вице-министрі Мақсат Қалиакпаров.
Бұл тәсіл облыстық және аудандық маңызы бар жолдарға, сондай-ақ елді мекендердегі көшелерге қатысты мәселелерді қамтиды.
Жол жобалары алдын ала сараптамадан өтпек
Жобалау кезеңіне де талап күшейтіледі.
Мамандар бірнеше бағытты қарастырады:
- жобаларды алдын ала сараптау;
- жол төсемінің үлгілік конструкцияларын пайдалану;
- BIM-жобалауды енгізу;
- көлік жүктемесін ескеру;
- климаттық жағдайларға сәйкес конструкция таңдау;
- жергілікті құрылыс материалдарының қолжетімділігін есепке алу.
Мақсат — барлық өңірге бірдей шешімді қолданбай, нақты жолдың жағдайына сәйкес конструкция таңдау.
Жол негізінің жағдайы, көлік қозғалысының қарқындылығы мен климат жобалау кезінде ескерілетін негізгі факторлардың қатарына енгізіледі.
Битум мен асфальтбетон сапасына бақылау күшейеді
Жолдың қанша уақыт қызмет ететіні тек жобалауға емес, құрылыс материалдары мен орындалған жұмыстардың сапасына да байланысты.
Семинарда зертханалық бақылау, сынама алу және сынақ нәтижелерінің дұрыстығы жеке қарастырылады.
Негізгі назар:
- битум сапасына;
- қиыршық тасқа;
- асфальтбетонға;
- зертханалық сынақтарға;
- материалдардың белгіленген талаптарға сәйкестігіне аударылады.
Талаптарға сәйкес келмейтін материал немесе жұмыс анықталған жағдайда қандай шара қолданылатыны да талқыланбақ.
Жолды салумен жұмыс аяқталмайды
Тағы бір мәселе — жөндеуден кейінгі күтім.
Облыстық және аудандық маңызы бар жолдар мен елді мекен көшелерінің жағдайын сақтау үшін маусымдық жұмыстарды ұйымдастыру, техника және қажетті материалдармен қамтамасыз ету мәселелері қаралады.
Ауыр жүк көліктеріне белгіленген шектеулердің сақталуына да назар аударылады. Мұндай бақылау жаңадан жөнделген жолдардың мерзімінен бұрын бұзылуына жол бермеуге бағытталған.
Осылайша, жаңа тәсіл тек жол салу немесе жөндеумен шектелмейді. Жолдың кейін қалай пайдаланылатыны мен күтіп ұсталатыны да жалпы басқару жүйесінің бөлігі болмақ.
Жолдағы ақаулар цифрлық жүйеде тіркеледі
Өңірлерге жол саласына арналған цифрлық шешімдер де ұсынылады.
Олар жол желісінің нақты жағдайын бақылауға, құрылыс пен жөндеу жұмыстарының орындалу барысын қадағалауға және анықталған кемшіліктерді тіркеуге мүмкіндік береді.
Жиналған ақпарат кейін басқарушылық шешім қабылдау кезінде пайдаланылмақ.
Көлік министрлігінің мақсаты — жолдың бүкіл өмірлік циклін бір жүйеге біріктіру:
- диагностика және басым учаскелерді анықтау;
- жоспарлау;
- жобалау;
- құрылыс және жөндеу;
- сапаны бақылау;
- пайдалану;
- кейінгі күтіп ұстау.
Бұл жағдайда жолдың жағдайы туралы мәлімет келесі жөндеу науқанын жоспарлауға қайта пайдаланылуы мүмкін.
Өңірлерге үш жылдық жол жоспары әзірленеді
Семинардың ең маңызды практикалық нәтижесі алдағы үш жылға арналған жұмыс жоспары болмақ.
Онда жергілікті автомобиль жолдарының сапасын арттыруға қажетті нақты шаралар, жауапты тұлғалар және орындау мерзімдері айқындалады.
Осылайша, өңірлердегі жол жұмыстары тек жыл сайынғы жөндеу тізімімен шектелмей, диагностикадан бастап кейінгі күтімге дейінгі кезеңдерді қамтитын орта мерзімді жоспарға біріктірілмек.
Семинар 2 қазанға дейін жалғасады.
Көлік министрлігі бұл жұмысты «Заң және тәртіп» қағидаттарымен байланыстырады. Ведомствоның ұстанымы бойынша, жобалаудан пайдалануға дейін белгіленген нормалардың сақталуы жол қауіпсіздігіне тікелей әсер етеді. Сондықтан сапасыз жұмыс пен анықталған бұзушылықтарды уақтылы жоюға жауапкершілік жол саласының барлық қатысушысына жүктелуге тиіс.
