Қазақстандық ауыл халықаралық деңгейде танылды. Ақмола облысындағы Родина ауылы БҰҰ Азық-түлік және ауыл шаруашылығы ұйымының Villages Recognition Initiative бастамасы аясында үздік ауылдық елді мекендердің қатарына енді, деп хабарлайды DKNews.kz.
ҚР Ауыл шаруашылығы министрлігінің мәліметінше, бастама ауыл шаруашылығы өндірісін орнықты дамытуды инфрақұрылым мен тұрғындардың өмір сүру сапасын жақсартумен ұштастыра алған ауылдық аумақтарды анықтауға бағытталған.
ФАО Родина ауылының тәжірибесін атап өтті
Родинаның басты ерекшелігі — ауыл шаруашылығы кәсіпорнының дамуы мен ауылдың әлеуметтік-экономикалық жағдайының өзара сабақтас болуы.
Бұл модельдің негізінде көпсалалы «Родина Агрофирмасы» серіктестігі тұр.
Кәсіпорын бірнеше бағытты қатар дамытып келеді:
- егін шаруашылығы;
- тұқым шаруашылығы;
- мал шаруашылығы;
- ауыл шаруашылығы өнімдерін өндіру;
- өнімді қайта өңдеу.
Министрлік қызметкерлері сапар барысында кәсіпорынның өндірістік нысандарымен қатар ауылдың әлеуметтік инфрақұрылымы және абаттандыру жұмыстарымен танысты.
Агрофирма ауылмен бірге дамып келеді
Кәсіпорынды аралау барысында «Родина Агрофирмасы» серіктестігінің бас директоры Иван Сауэр өндірістің негізгі бағыттарын таныстырды.
Ол ірі қара малды күтіп-бағу мен сауда қолданылатын заманауи технологияларды көрсетіп, ауыл шаруашылығы өнімдерін өндіру және қайта өңдеу кезеңдері туралы айтып берді.
Алайда агрофирманың жұмысы өндірістік көрсеткіштермен ғана шектелмейді.
Кәсіпорын ауылдағы білім беру, мәдениет және спорт нысандарына қолдау көрсетеді. Сонымен бірге елді мекенді абаттандыруға және тұрғындар үшін қолайлы орта қалыптастыруға қатысып келеді.
«Біз үшін кәсіпорынның ауылмен бірге дамуы аса маңызды. Кез келген өндірістік жетістіктің негізінде адамдардың еңбегі тұр. Олар — біздің қызметкерлеріміз, олардың отбасылары және осы аумақта тұратын тұрғындар. Сондықтан біз өндірістің тиімділігіне ғана емес, адамдардың жайлы өмір сүруіне де жағдай жасауға ұмтыламыз. Әлеуметтік нысандарды қолдап, ауылдың дамуына өз үлесімізді қосу — біздің адамдар мен туған жер алдындағы жауапкершілігіміз», — деді Иван Сауэр.
Ауыл шаруашылығы мамандары марапатталды
Сапар барысында агрофирманың күнделікті жұмысын қамтамасыз етіп отырған мамандарға да ерекше назар аударылды.
ҚР Ауыл шаруашылығы министрлігі аппаратының басшысы Сергей Ли агрофирма директорының орынбасары Андрей Веревкинге «Ауыл шаруашылығы саласының үздігі» төсбелгісін табыс етті.
Ауыл шаруашылығы министрінің Құрмет грамотасымен:
- машиналық сауу операторлары Айгерим Абдилдина, Марина Росщупкина және Кристина Улас;
- слесарьлар Валерий Губарев пен Иван Савченко;
- кәсіпорын қызметкері Ирина Маслина марапатталды.
«Ауыл шаруашылығындағы әрбір жетістіктің артында маңдай терін төгіп, күн сайын еңбек етіп жүрген адамдар бар. Олардың кәсібилігі мен жауапкершілігі — өндірістің тұрақты дамуының басты негіздерінің бірі. Бүгін біз өз еңбегімен кәсіпорынның ғана емес, тұтас елдің аграрлық саласының дамуына үлес қосып жүрген мамандарды марапаттадық. Осындай азаматтардың еңбегін бағалап, лайықты деңгейде құрмет көрсету маңызды», — деді Сергей Ли.
Родинаның тәжірибесі несімен ерекшеленеді
ФАО бастамасы аясындағы мойындау Родинаның тәжірибесін тек ауыл шаруашылығы өндірісі тұрғысынан ғана емес, ауылдық аумақты дамыту моделі ретінде де көрсетеді.
Мұнда аграрлық кәсіпорын ауыл экономикасының тірегіне айналып қана қоймай, әлеуметтік инфрақұрылымды қолдауға және тұрғындардың өмір сүру жағдайын жақсартуға қатысады.
Министрлік қызметкерлері сапар барысында осы тәжірибені жергілікті жерде зерделеп, аграрлық сектордағы өзекті мәселелерді талқылады және кәсіпорын өкілдерімен тәжірибе алмасты.
Бұған дейін біз Қазақстандағы ауыл шаруашылығы кәсіпорындарын дамыту және аграрлық өндірісті жаңғырту бағытындағы жобалар туралы жазған едік.
