Ұстаздардың пікірі тікелей жиналды. Қазақстандағы 250 мектепте еңбек ететін 25 мыңға жуық педагог білім сапасын арттыру және мектеп жүйесін дамыту бойынша өз ұсыныстарын жеткізді, деп хабарлайды DKNews.kz.
«Ұстаз айтса» республикалық диалог алаңы Ұстаздар күніне орай ұйымдастырылып, негізгі кездесу Астанадағы №101 мектепте өтті. Жоба туралы толық ақпарат «Ұстаз айтса» диалог алаңына арналған жарияланымда берілген.
Ұсыныстар 250 мектептен жиналды
«Ұстаз айтса» жобасының негізгі мақсаты — білім беру саласына қатысты шешімдерді талқылағанда мұғалімдердің өз пікірін есту және нақты ұсыныстарын жинау.
Бұл бір ғана елордалық кездесумен шектелген жоқ. Ел бойынша 250 мектептің педагогтері диалог алаңына қатысты.
Кездесулер барысында түскен ұсыныстар жүйеленіп, әрі қарай пысықтауға және нақты жұмыс барысында қарауға жіберіледі.
Астанадағы орталық кездесуге:
- Құрылтай депутаттары Асхат Аймағамбетов, Жарқынбек Амантай және Ләззат Жылқыбаева;
- «Әділет» партиясы Төрағасының орынбасары Ержан Жылқыбаев;
- Оқу-ағарту вице-министрі Жайық Шарабасов;
- елордалық педагогтер;
- білім беру саласының өкілдері қатысты.
Тоқаев мұғалімнің тәрбиедегі рөлін атап өтті
Диалог алаңы Ұстаздар күні аясында өтті. Осы мерекеге орай сөйлеген сөзінде Президент Қасым-Жомарт Тоқаев педагогтің міндеті тек білім берумен шектелмейтінін атап өтті.
«Көзі ашық, көкірегі ояу, тәрбиелі, заңға бағынатын адал азаматтар ең алдымен мектептегі мұғалімнен тәлім алады», — деді Президент.
Қазақстанда педагог мәртебесін көтеру соңғы жылдардағы білім саясатының негізгі бағыттарының бірі болып отыр.
2019 жылдан бері «Педагог мәртебесі туралы» Заң қолданыста. Мұғалімдердің жалақысы екі есе өсті, ал педагогтерді кәсібіне тән емес міндеттерге тартудан қорғау заңнамалық деңгейде бекітілді.
217 жаңа мектеп пайдалануға берілді
Педагогтерді қолдаумен қатар мектеп инфрақұрылымын кеңейту жалғасып жатыр.
«Келешек мектептері» ұлттық жобасы аясында Қазақстан өңірлерінде 460 мыңнан астам оқушы орнына арналған 217 мектеп салынып, пайдалануға берілді.
Алайда «Ұстаз айтса» алаңындағы әңгіме тек жаңа ғимараттар немесе мұғалімдердің әлеуметтік жағдайымен шектелген жоқ.
Педагогтер:
- білім сапасын;
- балаларды тәрбиелеуді;
- мұғалімдердің кәсіби құқықтарын;
- жасанды интеллектіні пайдалануды;
- цифрлық құралдарды қолдануды;
- сыни ойлауды дамытуды;
- оқушылардың жеке қабілеттерін ашуды;
- заманауи педагогтің қоғамдағы орнын талқылады.
Мұғалімдер ЖИ-ді сабақта қалай қолданатынын көрсетті
Кездесудің негізгі бөлігі педагогтердің өз тәжірибесін ортаға салуына арналды.
Қазақ тілі мен әдебиеті пәнінің мұғалімі Эльмира Шауенова оқушылардың сыни ойлау қабілетін дамыту, ұлттық және рухани-адамгершілік құндылықтарды қалыптастыру мәселелеріне тоқталды.
Математика пәнінің мұғалімі Салтанат Шаден сабаққа дайындалу және оқу материалдарын әзірлеу кезінде жасанды интеллект пен цифрлық құралдарды пайдалану тәжірибесімен бөлісті.
Информатика пәнінің мұғалімі Жаннұр Ержанова оқушылардың пәнге қызығушылығын арттыру және олардың жеке қабілеттерін ашу тәсілдерін ұсынды.
Бастауыш сынып мұғалімі Гүлсара Оспанова білім мен тәрбиені мектептің алғашқы жылдарынан бастап ұштастыру мәселесін көтерді.
Ал география пәнінің мұғалімі Нұрбек Ерікұлы мұғалімнің қоғамдағы рөліне, педагог мәртебесіне және қазіргі ұстаздың кәсіби болмысына назар аударды.
Мұғалімдер шешімдерді талқылауға қатысуы керек
«Әділет» партиясы Төрағасының орынбасары Ержан Жылқыбаевтың айтуынша, педагогтерді қолдау олардың пікірін тікелей ескерумен қатар жүруі керек.
«Педагогтерді қолдау туралы айтып қана қоймай, олардың пікірін тыңдап, нақты ұсыныстарын ескеру маңызды. Сонымен қатар жастардың оқу кезінде кәсіби тәжірибе жинақтауы үшін білім мен практиканың байланысын күшейту қажет. Мемлекет басшысының білім мен ғылымды дамыту саясатын қолдай отырып, «Әділет» партиясы осы міндеттердің жүзеге асуына атсалысады», — деді Ержан Жылқыбаев.
Партия бағдарламасында 2031 жылға қарай өндірістік ортада білім алатын студенттердің үлесін кемінде 45 пайызға жеткізу міндеті де белгіленген.
Бұл білім беру жүйесін еңбек нарығымен және практикалық тәжірибемен тығыз байланыстыруды көздейді.
Педагогтердің кәсіби құқықтары да талқыланды
Құрылтай депутаты Асхат Аймағамбетов педагогтердің кәсіби құқықтарын қорғау және олардың мәртебесін одан әрі арттыру мәселесіне жеке тоқталды.
Оның айтуынша, бұл бағыттағы жұмыста мұғалімдердің өздері көтеріп отырған мәселелер мен ұсыныстар ескерілуі қажет.
«Ұстаз айтса» жобасының практикалық маңызы да осы жерде көрінеді: педагогтердің ұсыныстары тек кездесулер аясында қалмай, жүйеленіп, әрі қарай қарауға беріледі.
25 мың педагогтің ұсынысы енді сараланады
Жобаның келесі кезеңіндегі негізгі мәселе — 250 мектептен жиналған ұсыныстардың қайсысы нақты шешімдерге айналатыны.
Кездесу соңында білім беру саласына қосқан үлесі үшін педагогтерге «Әділет» партиясы мен Оқу-ағарту министрлігінің Алғыс хаттары табысталды.
Сонымен бірге «Кітап оқитын ұлт» республикалық жобасын қолдау мақсатында Астанадағы №101 мектеп кітапханасына түрлі жанрдағы кітаптар сыйға берілді.
Білім беру саласындағы өзгерістер технологиялық бағытта да жалғасып жатыр. Бұған дейін біз жасанды интеллект қазақстандық мұғалімдерді артық жұмыстан қалай босатуы тиіс және мектептерде қандай өзгерістер жоспарланғаны туралы жазған едік.
