ЖОМС енді онлайн рәсімделеді. Қазақстандағы жұмыс берушілер қызметкерлерін еңбек міндеттерін орындау кезінде жазатайым оқиғалардан міндетті сақтандыру шартын кеңсеге бармай-ақ, менеджердің көмегінсіз өздері рәсімдей алады, деп хабарлайды DKNews.kz.
Жаңа онлайн-сервисті Қазақстан Республикасы Еңбек және халықты әлеуметтік қорғау министрлігінің қызметкерлерді сақтандырумен қамту аясын кеңейту жұмыстары шеңберінде Мемлекеттік аннуитеттік компания іске қосты.
ЖОМС шартын бір сайтта рәсімдеуге болады
Бизнес үшін басты өзгеріс — рәсімдеу процесінің толықтай қашықтан жүргізілуі. Тіркелуден бастап деректерді енгізу, сақтандыру құнын есептеу, шартты қалыптастыру және оған қол қоюға дейінгі барлық кезең онлайн қолжетімді.
Қажетті құжаттар мен анықтамаларды жұмыс беруші порталға тікелей жүктейді. Формаларды толтыру кезінде мәліметтердің бір бөлігі мемлекеттік ақпараттық жүйелер мен Бірыңғай сақтандыру дерекқорынан автоматты түрде алынады.
Қалған ақпаратты жұмыс беруші өзі енгізеді. Шартқа қол қоймас бұрын мәліметтерді тексеріп, қате анықталған жағдайда түзетуге мүмкіндік бар.
Шарт жасасу үшін заңды тұлғаның қолданыстағы электрондық цифрлық қолтаңбасы қажет.
Соның арқасында жұмыс берушіге сақтандыру компаниясының кеңсесіне барудың немесе бірнеше сервистің арасында ауысып жүрудің қажеті жоқ. Негізгі рәсімдердің бәрі бір сайтта орындалады.
Қазақстан сақтандырылған жұмыс берушілер санын 130 мыңға жеткізбек
ЖОМС-ты цифрландыру сақтандырумен қамтылған қызметкерлер саны өсіп отырған кезеңде қолға алынды. Еңбек министрлігінің дерегінше, қазір жазатайым оқиғалардан міндетті сақтандыру жүйесімен шамамен 3,5 млн қызметкер қамтылған.
Бұл бір жыл бұрынғы көрсеткіштен 1 млн 130 мың адамға көп.
Ендігі меже жұмыс берушілерге қатысты. 2026 жылдың соңына дейін ЖОМС шартын жасасқан жұмыс берушілер санын 130 мыңға жеткізу жоспарланып отыр.
Онлайн рәсімдеудің тағы бір практикалық артықшылығы бар: компания қай өңірде жұмыс істейтініне қарамастан, сақтандыру шартын қашықтан жасай алады.
«Онлайн-сервисті іске қосудың негізгі мақсаты — сақтандыруды рәсімдеу процесін жұмыс берушілер үшін барынша ыңғайлы әрі қолжетімді ету. Рәсімді цифрлық форматта өз бетінше өту мүмкіндігі уақытты үнемдеп, қажетті қызметті кеңсеге бармай-ақ алуға мүмкіндік береді», — деді Мемлекеттік аннуитеттік компания басқармасының төрағасы Олжас Ашкеев.
Жұмыс берушінің міндеті өзгермейді, рәсімдеу тәсілі жеңілдейді
ЖОМС еңбек міндеттерін орындау кезінде жазатайым оқиғаға ұшыраған қызметкерлерді әлеуметтік қорғау тетіктерінің бірі болып қала береді.
Заңнамада көзделген жағдайларда сақтандыру төлемдері еңбекке қабілеттіліктен айырылуға байланысты келтірілген зиянды, сондай-ақ емделуге, медициналық және кәсіптік оңалтуға жұмсалатын шығындарды өтеуге бағытталады.
Демек, онлайн-сервис бизнеске жаңа міндет жүктемейді. Ол бұрыннан бар міндетті орындаудың тәсілін жеңілдетеді: енді сақтандыру шартын толықтай қашықтан рәсімдеуге болады.
Мемлекеттік және сақтандыру жүйелеріндегі мәліметтердің дұрыстығы да ерекше мәнге ие болады. Бұған дейін біз HR Enbek жүйесіндегі ЖОМС туралы хабарлама неге әрдайым заңбұзушылықты білдірмейтінін және жұмыс беруші қай жағдайда қолданыстағы шарт туралы деректерді тексеруі керектігін жазған едік.
Сақтандыру өндірістік тәуекелдерді цифрлық бақылаумен толықтырылады
Еңбек министрлігі өндірістік жарақаттануды азайту бағытындағы жұмысты да жалғастырып жатыр. Осы мақсатта кәсіпорындарды мониторингтеудің цифрлық құралдары қолданылып, жұмыс орындарындағы кәсіптік тәуекелдерді бағалау жүйесі дамытылуда.
Бизнес үшін бұл екі бағыт бір-бірімен тікелей байланысты: мемлекет қызметкерлердің міндетті сақтандырумен қамтылуын кеңейтуді көздейді, ал шартты рәсімдеу процесі жұмыс берушілер үшін барынша қолжетімді бола түседі.
2026 жылдың соңына қойылған негізгі көрсеткіш — ЖОМС шартын жасасқан 130 мың жұмыс беруші. Онлайн форматтың сақтандырумен нақты қамтуды қаншалықты арттырғанын осы көрсеткіш айқындайды.
