«Бүркіт» арнайы жасағының тарихында жаңа кезең басталды. ҚР ІІМ Ұлттық ұланының элиталық бөлімшесіне алғаш рет қыз әскери қызметші қабылданды. «Китана» бүркеншік атымен танылған Қымбаттың арнайы жасақ қатарына қосылғаны туралы Ұлттық ұланның ресми ақпаратында айтылды.
Ол – халықаралық жарыстарда Қазақстан намысын қорғаған, жекпе-жек спортынан бірнеше дүркін әлем және Азия чемпионы атанған тәжірибелі спортшы. Енді Қымбаттың алдында жаңа мақсат тұр: арнайы жасақ жауынгерлері үшін ең күрделі сынақтардың бірі саналатын күрең беретке қол жеткізу, деп хабарлайды DKNews.kz.
Дубайдағы жеңіс оның өмірін өзгертті
Қымбаттың «Бүркіт» арнайы жасағына келуіне Дубайда өткен SWAT Challenge халықаралық жарысы себеп болды. Ол Қазақстан атынан қатысқан «Томирис» қыздар командасының сапында өнер көрсетті.
Қазақстандық қыздар әйелдер санатында қарсыластарын басып озып, бірінші орынға ие болды. Ал жалпы командалық есепте 18-орынға тұрақтап, бірқатар ерлер құрамаларынан жоғары нәтиже көрсетті.
Жарыс кезінде Китана мергендігімен ерекше көзге түсті. Оның дайындығы мен шеберлігін байқаған «Бүркіт» арнайы жасағы өз қатарына қосылуға ұсыныс жасады. Қымбат көп ойланбастан келісім берді.
Осылайша ол бөлімше тарихындағы алғашқы қыз әскери қызметші атанды.
Алты дүркін Қазақстан чемпионы: Китана қандай спортшы?
Қымбаттың арнайы жасаққа дейінгі спорттық жолы халықаралық деңгейдегі ірі жетістіктерге толы. Ол жекпе-жек спорттарының бірнеше түрінен Қазақстанның ғана емес, әлемнің үздік спортшыларымен бәсекеге түскен.
Оның басты жетістіктері:
- Қоян-қолтық ұрыстан алты дүркін Қазақстан чемпионы, әлем чемпионатының күміс және екі қола жүлдегері.
- Қоян-қолтық ұрыстан әлем кубогының, Еуропа және Азия чемпионаттарының күміс жүлдегері.
- Джиу-джитсудан үш дүркін әлем және Азия чемпионы, екі дүркін Еуропа чемпионы.
- ММА бойынша Қазақстан және Азия чемпионы.
- Жауынгерлік самбодан Қазақстан чемпионы және әлем чемпионатының қола жүлдегері.
- Дүниежүзілік полиция ойындарында дзюдодан алтын, джиу-джитсудан күміс медаль иегері.
Қымбат қоян-қолтық ұрыс пен джиу-джитсудан халықаралық дәрежедегі спорт шебері атағына ие. Сондай-ақ самбо және ММА бойынша спорт шебері.
Мұндай дайындық арнайы жасақ қызметінде маңызды саналатын төзімділік, шапшаңдық, күш пен жекпе-жек дағдыларын қалыптастыруға мүмкіндік береді. Дегенмен әскери қызметтің өз талаптары мен сынақтары бар.
Келесі мақсат – күрең берет
Қазір Қымбаттың басты мақсаты – күрең берет сынағынан сәтті өту. Бұл арнайы жасақ жауынгерінің дене дайындығын ғана емес, психологиялық төзімділігі мен ерік-жігерін де тексеретін күрделі сынақ.
Китана үшін бұл спорттық мансабындағы кезекті медаль емес, әскери қызметтегі жаңа белес болмақ.
Егер Қымбат сынақтан сәтті өтсе, ол ҚР ІІМ Ұлттық ұланы тарихында күрең беретке ие болған алғашқы қыз жауынгер атанады.
Әзірге бұл – оның алға қойған мақсаты. Ал «Бүркіт» арнайы жасағының қатарына қабылдануының өзі бөлімше тарихындағы алғашқы оқиға ретінде тіркелді.
Бұған дейін біз «Бүркіт» арнайы жасағының 101 жауынгері қатысқан «Күрең берет – 2026» сынағы туралы жазған едік. Қарағандыдағы «Қарабас» полигонында өткен бұл сынақ арнайы жасақ жауынгерлерінің дайындығы мен төзімділігін тексерді.
