Қытай Мысырдың 2024-2030 жылдарға арналған өнеркәсіптік стратегиясын ілгерілетуде маңызды рөл атқара алады. Бұл туралы 11-ші Akhbar El Youm экономикалық конференциясы аясында Синьхуа агенттігіне берген сұхбатында Мысыр Парламенті төрағасының орынбасары Мұхаммед Абу эль-Энейни мәлімдеді.
«Қытай негізгі өнеркәсіптік серіктес және Мысырдың өнеркәсіптік стратегиясының табыстылығын қамтамасыз етуде маңызды рөл атқара алады», - деді М.А.Эль-Энейни. Ол Қытайдың әртүрлі өнеркәсіп секторларында Мысырға қолдау көрсететінін баса айтып, Мысырда жұмыс істейтін көптеген танымал қытайлық компаниялардың Мысыр экономикасына үлкен үлес қосып жатқанын атап өтті.
«Екі ел арасындағы келешегі бар салалар мен жасанды интеллектке қатысты техникалық аспектіде ынтымақтастық кеңейіп, Мысыр экономикасының барлық аспектілері бойынша жандануына ықпал етеді деп сенемін», - деді М.А.Энейни. Ол сонымен қатар Қытай қазір елде автомобиль зауыттарын ашу арқылы Мысырға өзінің автомобиль өнеркәсібін локализациялауға көмектесіп жатқанын атап өтті.
«Қытай Африка мен Еуропаны байланыстыратын буын ретінде Мысырдың географиялық орнын пайдалана алады» деп, «Мысыр мен аймақтың көптеген елдері мен Еуропа арасында қол қойылған, Мысырда жасалған қытай өнімдеріне жаңа нарықтар ашатын келісімдерден Қытай да пайда көреді» деп қосты ол.
Akhbar El Youm экономикалық конференциясы сарапшылар, бизнес өкілдері және мемлекеттік шенеуніктер экономикалық көзқарастар мен идеялармен алмасатын жыл сайынғы платформа болып табылады.
