ҚХР Қаржы министрлігі ірі мемлекеттік коммерциялық банктеріне олардың бірінші деңгейдегі негізгі капиталын толықтыру бойынша қолдау көрсету үшін сомасы 500 млрд юань (шамамен 69,7 млрд АҚШ доллары) болатын арнайы қазынашылық облигацияларын шығаратынын хабарлады, деп хабарлайды Xinhua.
Капиталды толықтыру нарықтық және құқықтық қағидаттарға сәйкес теңгерімді түрде төрт коммерциялық банкті қолдау мақсатында жүзеге асырылады: Қытай Банкі, Қытай Құрылыс банкі, Қытай коммуникациялар банкі және Қытай пошта-жинақ банкі. Қазіргі уақытта елдің ірі мемлекеттік коммерциялық банктері тұрақты шаруашылық қызмет жүргізіп отыр, оларда активтердің берік сапасы мен ықтимал шығындарды жабу үшін жеткілікті резервтері бар. Бақыланатын негізгі көрсеткіштер «сау диапазонда» қалады, деді министрлік.
Бұл шара банктер қызметінің тиімділігін одан әрі нығайтуға және жақсартуға, оларды сапалы түрде дамытуға, инвесторлар үшін үлкенірек құндылық жасауға және ұзақ мерзімді тұрақты капитал кірісіне қол жеткізуге мүмкіндік береді деп күтілуде, деп мәлімдеді министрлік.
