Қытай Гуандун провинциясындағы Янцзян қаласы маңындағы теңіз акваториясынан «Цзелун-3» (Smart Dragon-3) зымыран тасығышы арқылы жеті спутникті сәтті орбитаға шығарды, деп хабарлайды Xinhua.
Ұшырылған аппараттардың ішінде Пәкістанның PRSC-EO2 жерді қашықтан зондтау спутнигі бар. Жоғары айырымдылықтағы оптикалық құрылғылармен жабдықталған спутник жер картографиясы, экологиялық мониторинг, табиғи апаттарды бақылау және табиғи ресурстарды басқару салаларында қолданылады.
Бұл миссия Қытай мен Пәкістан арасындағы ғарыш саласындағы ынтымақтастықтың маңызды кезеңі ретінде бағаланып отыр.
Аталған ұшыру — «Цзелун-3» зымыран тасығышының бірнеше спутникпен жүзеге асқан төртінші коммерциялық миссиясы. Сарапшылар бұл модельдің жүк бейімделгіштігі мен коммерциялық мүмкіндігі жоғары екенін атап өтуде.
