CEC Capital Group инвестициялық банкінің болжамына сәйкес, 2030 жылға қарай Қытайдың биотехнологияға негізделген өңдеу өнеркәсібі нарығының көлемі 1,8 трлн юаньға жетеді. Бұл әлемдік нарықтың шамамен төрттен бір бөлігін құрайды, деп хабарлайды Xinhua.
Биоөңдеу өнеркәсібі тірі организмдерді (жасушалар, ферменттер және т.б.) пайдалану арқылы заттарды ауқымды қайта өңдеу және синтездеуді қамтиды. Бұл сала медицина, химия, материал өндірісі және энергетика сияқты көптеген бағыттарды біріктіреді.
Қытай бұл стратегиялық бағытты белсенді дамыту арқылы экономиканы инновациялық және экологиялық тұрақты модельге көшіруде маңызды қадам жасауда. Қазіргі таңда елдің 20-дан астам провинциясы мен қаласы арнайы қолдау шараларын қабылдаған, соның ішінде ғылыми қорлар құру және өнеркәсіптік парктер салу бастамалары бар.
Алдыңғы қатарлы металлургиялық Shougang Group компаниясында өндірістік шығарындылар биореакторларға бағытталып, арнайы микроорганизмдер көмегімен 80 пайыздан астам шикі ақуызға ие біржасушалы ақуызға айналдырылады. Осылайша өндірістік қалдықтар құнды ресурсқа айналуда.
Қытай биотехнология, өнеркәсіптік инженерия және цифрлық технологиялардағы артықшылықтарын біріктіре отырып, болашақта неғұрлым инновациялық әрі тұрақты экономиканың негізін қалап отыр.
