Қытай мен Корея Халық Демократиялық Республикасы (КХДР) арасындағы халықаралық жолаушылар теміржол қатынасы 12 наурыздан бастап екі бағытта да қайта іске қосылады. Бұл туралы Қытай мемлекеттік теміржол корпорациясы хабарлады, деп хабарлайды Xinhua.
Жаңа теміржол бағыты Қытайдың астанасы Бейжің мен Қытайдың солтүстік-шығысындағы Ляонин провинциясында орналасқан шекаралық Даньдун қаласын КХДР астанасы Пхеньянмен байланыстырады. Бұл өз кезегінде екі ел арасындағы адамдардың қозғалысын жеңілдетіп, сауда-экономикалық ынтымақтастықты және мәдени-гуманитарлық алмасуды одан әрі дамытуға ықпал етеді.
Бейжің мен Пхеньян арасындағы пойыздар аптасына төрт рет — дүйсенбі, сәрсенбі, бейсенбі және сенбі күндері екі бағытта да қатынайды. Ал Даньдун – Пхеньян бағыты бойынша теміржол қатынасы күн сайын жүзеге асырылады.
Аталған халықаралық бағыттар бойынша билеттерді сату теміржол вокзалдарындағы кассаларда басталып кетті.
Қытай мемлекеттік теміржол корпорациясының халықаралық департаментінің өкілі атап өткендей, Қытай мен КХДР арасындағы халықаралық жолаушылар пойыздары шекарааралық жолаушыларға қызмет көрсететін маңызды арна ғана емес, сонымен қатар екі ел арасындағы достықты нығайтатын байланыстырушы көпір болып табылады.
