Қытай мен Орталық Азия елдерінің шөлейттенудің алдын алу және оған қарсы күрес жөніндегі ынтымақтастық орталығы 2025 жылы құрылғаннан бері бірқатар маңызды нәтижелерге қол жеткізді. Бұл туралы Қытайдың солтүстік-батысындағы Нинся-Хуэй автономиялық ауданының орман және дала шаруашылығы басқармасы хабарлады. Аталған орталық іргелі ғылыми зерттеулерді күшейту, халықаралық алмасу мен оқыту шараларын өткізу, сондай-ақ бірлескен жобаларды іске асыру арқылы шөлейттенуге қарсы күрес саласындағы ынтымақтастықты дамытып келеді.
2025 жылдың маусым айында өткен Қытай – Орталық Азия екінші саммиті барысында осы ынтымақтастық аясында шөлейттенудің алдын алу және онымен күрес жөніндегі арнайы орталық құру туралы жарияланған болатын. Орталық Нинся-Хуэй автономиялық ауданында орналасқан.
Ведомствоның мәліметінше, 2025 жылғы 26 тамыз бен 1 қыркүйек аралығында Нинся-Хуэй автономиялық ауданының орман және дала шаруашылығы басқармасы мен БҰҰ-ның шөлейттенуге қарсы күрес жөніндегі конвенциясының хатшылығы бірлесіп «2025 жылғы шөлейттенуге қарсы күрес технологиялары мен тәжірибесі бойынша халықаралық семинар» өткізді. Аталған шараға 12 елден, соның ішінде Орталық Азия мемлекеттерінен 23 маман қатысты. Қазіргі уақытқа дейін орталық 37 елден келген 9 халықаралық делегацияны қабылдап, Қытайдың шөлейттенумен күрес саласындағы тәжірибесі мен технологияларын таныстырды.
Сонымен қатар орталық іргелі зерттеулерді күшейтіп, Қытай ғылым академиясы, Қытай қоғамдық ғылымдар академиясы және басқа да ұйымдарға төрт маңызды құжат әзірлеуді тапсырды. Олардың қатарында «Қытай мен Орталық Азия елдерінің шөлейттенудің алдын алу және оған қарсы күрес жөніндегі ынтымақтастық орталығының стратегиялық зерттеулері» және «Технологиялар тізімі мен оларды тарату әлеуеті туралы талдамалық есеп» бар. Бұл құжаттарда Орталық Азия елдерінің шөлейттенуге қарсы күрес саласындағы қажеттіліктері мен ынтымақтастық мүмкіндіктері жан-жақты қарастырылған.
2026 жылы аталған орталық Қытай мен Орталық Азия елдерінің бірлескен ғылыми-зерттеу жобасын іске асыруды жоспарлап отыр. Жоба аясында Өзбекстандағы шөлейттену проблемасы өзекті болып отырған өңірлерде осы бағыттағы технологияларды зерттеу жұмыстары жүргізіледі.
