2026 жылдың басынан бері Қытайда тұтыну тауарларын трейд-ин тетігі арқылы айырбастауға арналған мемлекеттік бағдарлама аясындағы сату көлемі 500 миллиард юаньнан асты. Бұл туралы Қытай Халық Республикасының Сауда министрлігінің деректерінде көрсетілген.
12 сәуірдегі жағдай бойынша жалпы сату көлемі 502,94 миллиард юаньды (шамамен 73,33 миллиард АҚШ доллары) құрап, 69,78 миллионға жуық сатып алуды қамтыды.
Ең үлкен үлесті автомобиль секторы қосты: бағдарлама аясында 1,67 миллионнан астам автокөлік сатылып, олардың жалпы құны 269,44 миллиард юаньнан асты.
Тұрмыстық техника сегментінде де айтарлықтай нәтижелер тіркелді — 27 миллионнан астам өнім бірлігі сатылып, жалпы сомасы 111,09 миллиард юаньды құрады. Сонымен қатар цифрлық және «ақылды» құрылғылардың сатылымы 41,08 миллион бірліктен асып, 122,41 миллиард юань көлемінде табыс әкелді.
Сарапшылардың айтуынша, трейд-ин бағдарламасы ішкі сұранысты ынталандырып, тұтыну тауарларын жаңартуды жеделдетуге және неғұрлым технологиялық әрі энергия үнемдейтін шешімдерге көшуге қолдау көрсетеді.
Айта кетейік, 2025 жылы бағдарлама 366 миллион сатып алуды қамтып, жалпы сату көлемі 2,61 триллион юаньға жеткен, бұл оның елдегі экономикалық белсенділікті қолдаудағы рөлінің артып келе жатқанын көрсетеді.
