12-ші Қытайдың үлкен деректер индустриясы бойынша халықаралық көрмесі /Big Data Industry Expo/ тамыз айында Қытайдың оңтүстік-батысындағы Гуйчжоу провинциясының әкімшілік орталығы Гуйян қаласында өтеді. Бұл туралы бейсенбі күні жергілікті билік органдары хабарлады.
Big Data Industry Expo — үлкен деректер тақырыбына арналған әлемдегі алғашқы көрме. 2015 жылы құрылғаннан бері бұл шара жаһандық цифрлық экономиканың дамуындағы жаңа үрдістерді таныстыру алаңына, сондай-ақ саладағы жетістіктермен алмасудың маңызды платформасына айналды.
2026 жылғы көрмені Қытайдың Мемлекеттік деректер басқармасы мен Гуйчжоу провинциясының үкіметі бірлесіп ұйымдастырады. Көрме 6 секциядан тұрады, ал кәсіби экспозициялық стендтер 60 мың шаршы метр аумаққа орналастырылады.
Гуйян қаласының тұрғындары қаланы ұлттық деңгейдегі есептеу қуатын қамтамасыз ету базасына және Қытайдың батыс бөлігіндегі цифрлық экономиканың инновациялық орталығына айналдыру үшін бар күш-жігерін жұмсауда, деп мәлімдеді қала әкімінің орынбасары Фу Тао.
Қазіргі уақытта қалада 27 ірі және аса ірі есептеу орталығы бар, олардың жиынтық есептеу қуаты 165 эксафлопстан асады. Оның ішінде зияткерлік есептеулердің үлесі 98 пайыздан жоғары, ал жергіліктендіру деңгейі 90 пайызға жетеді. Осы көрсеткіштердің арқасында Гуйян Қытайдағы ең қуатты әрі ресурстары мол есептеу инфрақұрылымы шоғырланған өңірлердің біріне айналды, деп қосты Фу Тао.
