Тәжікстан астанасы Душанбе қаласында дүйсенбі күні Душанбе су процесі аясында «Тұрақты даму үшін су» 2018–2028 жылдарға арналған халықаралық іс-қимыл онжылдығына арналған 4-ші жоғары деңгейдегі халықаралық конференция басталды.
Конференция 25–28 мамыр аралығында өтеді және 2026 жылғы БҰҰ-ның су ресурстары жөніндегі конференциясына дайындықтың маңызды кезеңіне айналады.
Іс-шараға мемлекет және үкімет басшылары, БҰҰ құрылымдары, халықаралық және өңірлік ұйымдар, қаржы институттары, ғылыми мекемелер мен азаматтық қоғам өкілдері қатысуда.
Конференцияның негізгі мақсаты — ұжымдық күш-жігерді одан әрі жандандыруға арналған алаң ұсыну, БҰҰ-ның су ресурстары жөніндегі конференциясының Су жөніндегі іс-қимыл күн тәртібінде тіркелген ерікті міндеттемелерді жүзеге асыруды қолдау, сондай-ақ жаңа серіктестіктерді ынталандыру және 2030 жылға дейінгі Тұрақты даму күн тәртібінің мақсаттарына қол жеткізу жөніндегі іс-қимылды жеделдету.
Төрт күндік конференция барысында жоғары деңгейдегі пленарлық отырыстар, тоғыз тақырыптық сессия, конференция алдындағы форумдар, қатар өтетін іс-шаралар мен халықаралық көрме ұйымдастырылады.
Душанбе су процесі — Тәжікстан үкіметінің БҰҰ-мен тығыз ынтымақтастықта екі жыл сайын өткізілетін конференциялар сериясы арқылы «Тұрақты даму үшін су» 2018–2028 жылдарға арналған халықаралық іс-қимыл онжылдығы мақсаттарын жүзеге асыруды қолдауға бағытталған бастамасы.
