Қытайда экологиялық таза ауыл шаруашылығы өнімдеріне сұраныстың артуы Бразилияда тұрақты өндірістің дамуына ықпал етіп, тропикалық ормандарды сақтауға көмектесуде.
Осы аптада Тяньцзинь ет қауымдастығы орманды алқаптарды жоюсыз өндірілген және тиісті сертификат алған бразилиялық сиыр етінің 50 мың тоннасын сатып алу туралы келісімге қол қойды. Жеткізілімдер 2027 жылдың соңына дейін аяқталуы тиіс.
Мұндай өнімнің бағасы кәдімгі өнімнен 5–10 пайызға қымбат болғанына қарамастан, сала өкілдері оған сұраныстың жоғары болатынына сенімді. Экологиялық сертификатталған сиыр еті премиум санаттағы супермаркеттерге, жоғары деңгейлі мейрамханаларға және электрондық сауда платформалары арқылы жеткізіледі деп күтілуде.
Нарық қатысушыларының айтуынша, қытайлық тұтынушылар барған сайын өнімнің бағасына ғана емес, оның шығу тегіне, сапасына және жеткізу тізбегінің толық қадағалану мүмкіндігіне де назар аударады.
Бұл үрдіс ауыл шаруашылығы өнімдерінің басқа түрлеріне де таралуда. 2025 жылы COFCO International, Modern Farming және China Shengmu Organic Milk компаниялары 2025–2030 жылдар аралығында Қытайға тұрақты өндірілген 1,5 млн тонна бразилиялық соя бұршағын жеткізу туралы келісім жасады. Экологиялық стандарттардың сақталуын тәуелсіз аудиторлар бақылап отырады.
Сарапшылардың пікірінше, ормандарды жоюмен байланысты өнімдерді сатып алудан бас тарту өндірушілерді шаруашылық жүргізудің экологиялық таза әдістеріне көшуге ынталандырады. Бұл тропикалық ормандарды сақтауға және климатқа теріс әсерді азайтуға ықпал етеді.
ҚХР-дың 2026–2030 жылдарға арналған 15-бесжылдық жоспарына сәйкес, ел экологиялық таза өндіріс пен тұтыну модельдерін дамытуды жеделдетуді, «жасыл» тауарларды қолдауды кеңейтуді және экологиялық таза өнімдерді мемлекеттік сатып алу көлемін арттыруды көздеп отыр.
Бразилияның Сауда мен инвестицияларды ілгерілету агенттігінің президенті Лаудемир Мюллер қытайлық тұтынушылардың экологиялық санасының артуы бразилиялық өндірушілерді тұрақты өндіріс тәжірибелерін белсендірек енгізуге ынталандырып жатқанын атап өтті. Оның айтуынша, бұл олардың өнімдерінің әлемдік нарықтағы бәсекеге қабілеттілігін арттырады.
Сарапшылар Қытай мен Бразилияның тұрақты ауыл шаруашылығы саласындағы ынтымақтастығы жаһандық азық-түлік қауіпсіздігін қамтамасыз етуге және климаттың өзгеруімен күреске маңызды үлес қоса алатынын атап көрсетеді.
