Қазақстан Республикасының Энергетика министрлігі, Ұлттық геологиялық қызмет және Shell Kazakhstan көмірсутек ресурстары жөніндегі деректерді зерттеу және талдау саласындағы ынтымақтастық туралы меморандумға қол қойды. Бұл туралы ҚР Энергетика министрлігінің баспасөз қызметі хабарлады.
Серіктестік аясында негізгі назар халықаралық озық тәжірибені енгізуге және архивтік геологиялық деректерді цифрландыруға аударылады. Құжат мамандар даярлау, білім алмасу және жер қойнауын кешенді талдау үшін платформа құруды көздейді.
Ынтымақтастықтың басты элементі заманауи геоақпараттық жүйені құру жөніндегі пилоттық жобаны іске асыру болмақ. Бұл жүйе ұзақ жылдар бойы жинақталған геологиялық деректерді неғұрлым терең өңдеуге және интерпретациялауға мүмкіндік береді.
Энергетика министрлігінің мәліметінше, геологиялық ақпаратты цифрландыру жер қойнауын зерттеу тиімділігін арттыруға, елдің ресурстық әлеуеті туралы түсінікті кеңейтуге және Қазақстанның мұнай-газ саласының инвестициялық тартымдылығын күшейтуге ықпал етеді.
