ҚХР Табиғи ресурстар министрлігі Қытай юрисдикциясындағы Тайвань аралының шығысындағы теңіз акваториясында кешенді теңіз экологиялық зерттеуі жүргізілгенін хабарлады.
Ведомствоның мәліметінше, 16–18 маусым аралығында Шығыс Қытай теңізі басқармасының қарамағындағы «Сянъянхун-22» ғылыми-зерттеу кемесі аталған ауданда бірқатар ғылыми бақылаулар мен экологиялық өлшеулер жүргізді.
Экспедиция барысында мамандар теңіздегі экологиялық ДНҚ үлгілерін жинап, теңіз құстары мен киттәрізділер популяцияларына мониторинг жүргізді. Сонымен қатар судың химиялық құрамы мен гидрометеорологиялық жағдайлар зерттелді.
Министрліктің атап өтуінше, алынған деректер маңызды теңіз экожүйелерінің жай-күйін және әртүрлі түрлердің тіршілік ету ортасын тереңірек түсінуге мүмкіндік береді. Сондай-ақ олар акваторияның экологиялық жағдайын бағалау мен теңіз биоалуантүрлілігін сақтау бойынша ғылыми негіз қалыптастырады.
Зерттеу нәтижелері теңіз ортасын одан әрі мониторингтеуге және Қытайдың жағалау суларындағы табиғи ресурстарды қорғау шараларын жетілдіруге пайдаланылатын болады.
