Қытайлық Chery автоконцерні Оңтүстік Африка Республикасындағы алғашқы өндірістік кәсіпорнын ашатынын жариялады. Зауыт Претория қаласына жақын орналасқан Росслин индустриялық аймағында бой көтереді және компанияның Африка құрлығындағы алғашқы өндіріс орны болады.
Chery компаниясының төрағасы Инь Тунъюэнің айтуынша, бұл жоба компанияның «импорттаушыдан өндірушіге» айналу кезеңін білдіреді әрі оның Оңтүстік Африка нарығына ұзақ мерзімді ниетін растайды.
Оңтүстік Африка вице-президенті Пол Машатиле Chery инвестициялары заманауи технологияларды енгізуге, өндірісті автоматтандыру мен цифрландыруға, сондай-ақ елдің өнеркәсіптік әлеуетін нығайтуға ықпал ететінін атап өтті. Оның айтуынша, қытайлық инвесторлар Оңтүстік Африканы бүкіл Африка құрлығының нарығына шығуға қолайлы алаң ретінде қарастырады.
Қытайдың ОАР-дағы елшісі У Пэн бұл жобаны Қытай мен Оңтүстік Африка арасындағы өнеркәсіптік ынтымақтастықтың тереңдеуінің жарқын үлгісі деп бағалап, жаңа зауыт екі елдің автомобиль өнеркәсібінің дамуына қосымша серпін беретінін айтты.
Кәсіпорында өндірісті 2027 жылдың ортасында бастау жоспарланған. Сол жылдың екінші жартысында зауыт алғашқы 15 мың автокөлікті шығаруды көздейді. Жобалық қуатына шыққаннан кейін өндіріс көлемі жылына 50 мың автокөлікке жетеді.
Компания кәсіпорындағы қазіргі 692 жұмыс орнын толық сақтап, өндіріс, логистика және оған іргелес салаларда шамамен тағы 3 мың тікелей және жанама жұмыс орнын құруды жоспарлап отыр. Болашақта бұл алаң өндірісті, ғылыми-зерттеу және тәжірибелік-конструкторлық жұмыстарды, жеткізу тізбектерін дамытуды және мамандар даярлауды біріктіретін кешенді автомобиль орталығына айналады.
1997 жылы құрылған Chery компаниясы бүгінде әлемнің 130-дан астам елі мен өңірінде жұмыс істейді. Автоконцерн Оңтүстік Африка нарығына 2021 жылы шығып, бірнеше жылдың ішінде елдегі ең қарқынды дамып келе жатқан автомобиль брендтерінің біріне айналды. Қазіргі уақытта компанияның өнім желісі Chery, OMODA, JAECOO, Jetour, iCAUR және LEPAS брендтерін қамтиды.
