Қытайда 2026 жылдың қорытындысы бойынша гуманоид роботтар өндірісі 100 мың данадан асады деп күтілуде. Бұл туралы Қытайдың Өнеркәсіп және ақпараттық технологиялар министрлігі Ғылым және технологиялар департаменті директорының орынбасары Гань Сяобинь мәлімдеді.
Оның айтуынша, жасанды интеллект технологияларының қарқынды дамуы және оларды қолдану аясының кеңеюі робот техникасы саласының өсуіне қуатты серпін беріп, ел экономикасының сапалы дамуына ықпал етуде. Қазіргі уақытта Қытайдың ірі өнеркәсіптік кәсіпорындарында жасанды интеллект технологияларын енгізу деңгейі 30 пайыздан асты.
Гань Сяобинь сондай-ақ Жасанды интеллект индустриясын дамыту жөніндегі ұлттық инвестициялық қор инновациялық әзірлемелер мен технологияларды коммерцияландыруды қолдау үшін жеке инвестицияларды тартуды жалғастырып жатқанын айтты.
Саланың соңғы жетістіктері 17–20 шілде аралығында Шанхайда «Жарқын болашақ үшін жасанды интеллект серіктестігі» ұранымен өтетін Жасанды интеллект жөніндегі дүниежүзілік конференцияда (WAIC 2026) таныстырылады.
Форум бағдарламасына тақырыптық конференциялар, озық технологиялар көрмесі, инновациялық жобалардың тұсаукесерлері, сондай-ақ халықаралық ынтымақтастықты дамыту және кадрлар даярлау мәселелеріне арналған іс-шаралар кіреді. WAIC 2026 конференциясына 1100-ден астам компания тіркелген. Олар 3000-нан астам экспонатты, соның ішінде 300-ден астам жаңа технологиялық өнімнің әлемдік тұсаукесерін ұсынады.
