Қытайдың Сиань қаласында 2026 жылғы Дүниежүзілік интернет-конференция (WIC) аясында «Цифрлық Жібек жолын» дамыту форумы ашылды. Іс-шараға 50-ден астам ел мен өңірден келген шамамен 800 өкіл, сондай-ақ жеті халықаралық ұйымның делегациялары қатысуда.
Форумның басты тақырыбы цифрлық технологиялар, жасанды интеллект және трансшекаралық цифрлық экономика салаларындағы халықаралық ынтымақтастықты дамыту болды. Қатысушылар цифрлық сауда, бірлескен инновациялар, интеллектуалды технологияларды дамыту, киберқауіпсіздік және цифрлық шешімдер арқылы мәдени мұраны сақтау мәселелерін талқылайды.
Форумда сөз сөйлеген Бангладеш пен Сенегал өкілдері Қытаймен ынтымақтастықтың цифрлық инфрақұрылымды, электрондық коммерцияны және телекоммуникация саласын дамытуға ықпал етіп отырғанын атап өтті. Олардың пікірінше, «Цифрлық Жібек жолы» бастамасы елдер арасындағы технологиялық әріптестік пен тәжірибе алмасудың маңызды алаңына айналуда.
Цифрлық ынтымақтастықты дамыту Қытайдың 15-бесжылдығының (2026–2030 жылдар) басым бағыттарының бірі болып қала береді. Жоспарда жасанды интеллект, цифрлық экономика және электрондық коммерция салаларындағы халықаралық өзара іс-қимылды кеңейту көзделген. Сианьдағы бұл форум қатарынан үшінші жыл өткізіліп отыр.
