Қытайдың Ганьсу провинциясы әлемнің 13 елінде, соның ішінде Қазақстан, Беларусь, Қырғызстан, Венгрия және Украинада дәстүрлі қытай медицинасының 17 колледжі мен орталығын құрды. Бұл мекемелерде қазірдің өзінде 256 мың науқасқа медициналық көмек көрсетіліп, 3 мыңнан астам адам дәстүрлі қытай медицинасы бағдарламалары бойынша білім алды, деп хабарлайды «Синьхуа» агенттігі провинцияның дәстүрлі қытай медицинасы және фармацевтика істері жөніндегі басқармасына сілтеме жасап.
Ганьсу шетелдегі орталықтар желісін 2013 жылдан бастап дамытып келеді. Сонымен қатар провинция шетелдік мамандар даярлау ауқымын кеңейтуде. 2015 жылдан бері Ганьсу дәстүрлі қытай медицинасы университеті оннан астам елден, соның ішінде Қырғызстан мен Тәжікстаннан 300-ден астам студентті қабылдады. Шетелдік студенттер бакалавриат, магистратура және докторантура бағдарламалары бойынша білім ала алады.
Өңірдің фармацевтика саласының халықаралық нарықтағы үлесі де артып келеді. Басқарма басшысы Лю Божунның айтуынша, бүгінде Ганьсу дәстүрлі қытай медицинасына арналған дәрілік шикізатты 19 елге жеткізеді, ал провинция кәсіпорындары шетелде 1,5 мыңнан астам өнім атауын тіркеген.
Алдағы бес жылда Ганьсу шетелде жұмыс істеп тұрған 17 колледж бен орталықты одан әрі дамытуға басымдық бермек. Оларға консультация беру үшін тәжірибелі қытайлық дәрігерлерді тұрақты түрде жіберу, дәстүрлі қытай медицинасы әдістерімен диагностика жүргізу және емдеу, сондай-ақ жергілікті мамандарды даярлау ауқымын кеңейту жоспарланып отыр.
