Шанхайда кәсіби шеберлік бойынша 48-ші WorldSkills Competition әлем чемпионаты өтіп жатыр. Оған 68 ел мен өңірден 1385 қатысушы жиналды. Жас мамандар дәстүрлі кәсіптерден бастап жаңа технологияларға байланысты бағыттарға дейінгі 64 кәсіби құзыреттілік бойынша бақ сынауда.
Сонымен қатар қалада технологиялық өзгерістер жағдайындағы кәсіптік білім берудің болашағы мен дағдыларды дамыту мәселелеріне арналған WorldSkills Conference 2026 өтіп жатыр. Оның ашылу рәсіміне әлемнің түкпір-түкпірінен түрлі қызмет салаларының 1900-ге жуық өкілі қатысты.
Конференцияда сөз сөйлеген Қытай Халық Республикасы Мемлекеттік кеңесінің Премьері Ли Цян ғылыми-технологиялық революция мен өнеркәсіптік трансформацияның жаңа кезеңі кәсіби дағдыларға қойылатын талаптарды өзгертіп жатқанын атап өтті. Ол халықаралық тәжірибе алмасуды кеңейтуге, кәсіптік білім беруді дамытуға және оқу орындары мен кәсіпорындар арасындағы өзара іс-қимылды нығайтуға шақырды.
Ли Цян жасанды интеллект мәселесіне ерекше назар аударды. Оның айтуынша, жасанды интеллект саласындағы базалық білім беруді кеңейтіп, қызметкерлерге жаңа құзыреттерді меңгеруге және еңбек нарығындағы өзгерістерді ескере отырып қайта даярлаудан өтуге көмектесу қажет.
Қытай сондай-ақ кәсіби дағдылар саласындағы халықаралық ынтымақтастық тетіктерін дамытуды, соның ішінде Кәсіби шеберліктің жаһандық инновациялық орталығын құруды және «Бір белдеу, бір жол» бастамасы мен Оңтүстік — Оңтүстік ынтымақтастығы аясында бірлескен жобаларды жүзеге асыруды ұсынды.
WorldSkills Conference 2026 ашылу рәсіміне Малайзия Премьер-министрі Анвар Ибрагим мен WorldSkills International президенті Франсис Уран да қатысты.
Шанхайдағы WorldSkills чемпионаты 27 қыркүйекке дейін жалғасады. Жарыстардан бөлек, оның бағдарламасына халықаралық конференция мен кәсіби шеберлік көрмесі кіреді.
