Ашық бастапқы кодты жасанды интеллект және жасанды интеллектіні дамыту мен басқару саласындағы халықаралық ынтымақтастық 2026 жылғы Дүниежүзілік интернет конференциясының (World Internet Conference, WIC) Учжэнь саммитінің негізгі тақырыптарына айналады.
Саммит 2–5 қараша аралығында Қытайдың шығысындағы Чжэцзян провинциясының Учжэнь кентінде өтеді. Қытай мен басқа елдердің өкілдері жасанды интеллектіні инновациялық дамыту, қауіпсіздік, халықаралық ынтымақтастық және цифрлық саладағы өзара іс-қимыл мәселелерін талқылайды.
Негізгі іс-шаралардың бірі «Жасанды интеллект жөніндегі Учжэнь диалогы» болмақ. Оған жетекші технологиялық компаниялардың басшылары мен ашық бастапқы кодты ірі модельдерді әзірлеушілер шақырылды. Пікірталастың басты тақырыбы ашық жасанды интеллектінің жаһандық экожүйесін қалыптастыру болмақ.
Саммит бағдарламасына қатар өтетін 27 кіші форум енгізілген. Олар киберкеңістіктегі ынтымақтастыққа, робототехника мен іске асқан жасанды интеллектіге, интеллектуалды агенттердің өзара іс-қимылына, кеңістіктік-уақыттық интеллектіге және басқа да перспективалы бағыттарға арналады.
Ұйымдастырушылар ашық бастапқы код саласындағы халықаралық ынтымақтастыққа ерекше назар аудармақ. Бұл тәсіл шілде айында Шанхайда өткен 2026 жылғы Жасанды интеллект жөніндегі дүниежүзілік конференцияда ұсынылған бастамалардың жалғасы болып табылады. Онда ашық экожүйелерді дамыту, ережелер мен стандарттарды бірлесіп әзірлеу, сондай-ақ жасанды интеллект қауіпсіздігі саласындағы ынтымақтастық басым бағыттар ретінде белгіленген болатын.
Учжэнь саммитінің бағдарламасына сондай-ақ Дүниежүзілік интернет конференциясының «Үздік үлесі үшін» және «Ғылым мен технология саласындағы жаңашыл жетістіктері үшін» сыйлықтарын табыстау, «Интернет нұры» ЭКСПО көрмесі және жаһандық киберкеңістікті дамыту саласындағы жобалардың таныстырылымы кіреді.
Учжэнь саммиті 2014 жылдан бері өткізіліп келеді және мемлекеттік құрылымдардың, халықаралық ұйымдардың, ірі технологиялық компаниялардың өкілдерін, ғалымдар мен сарапшыларды біріктіреді. Дүниежүзілік интернет конференциясы 2022 жылы штаб-пәтері Бейжіңде орналасқан халықаралық ұйым мәртебесіне ие болды.
