Қытай мен Еуропалық одақ гибридті және электрлі автомобильдер саудасы мәселелері бойынша өзара түсіністікке қол жеткізді. Келісілген ұстанымдар Қытай автомобиль өнімдерінің Еуропа нарығына шығу шарттарына, жеткізушілерге қатысты кемсітпеу қағидатын сақтауға және электромобильдер импортына байланысты келіспеушіліктерді одан әрі реттеуге қатысты.
Бұл туралы Бейжің мен Брюссель арасындағы консультациялардың нәтижелеріне түсініктеме берген Қытай Халық Республикасы Коммерция министрлігінің ресми өкілі хабарлады. Гибридті автомобильдерге қатысты тараптар үш негізгі қағидат бойынша уағдаласты: нарықтағы нақты жағдайды ескеру, кемсітушілікке жол бермеу және Дүниежүзілік сауда ұйымының (ДСҰ) ережелерін сақтау.
Еуростаттың мәліметінше, Еуроодаққа Қытайдан импортталған гибридті автомобильдер саны 2024 жылғы 107 мыңнан 2025 жылы 302 мыңға дейін өсті. Қытай ведомствосының хабарлауынша, қол жеткізілген өзара түсіністік екі тараптың автомобиль өнеркәсібінің мүдделерін ескере отырып, жеткізілім көлемін 2025 жылғы деңгейден әрі қарай арттыру мүмкіндігін қарастырады.
Бейжің импорттаушыларға тең көзқарас танытудың қажеттігін де ерекше атап өтті. Қытай тарапының ұстанымына сәйкес, кез келген шектеулер тек Қытай автомобильдеріне ғана бағытталмауға тиіс. Импорттық квоталарды бөлу кезінде Қытайға басқа жеткізуші елдерге қарағанда қолайсыздау шарттар ұсынылмауы керек.
Сонымен қатар ҚХР Коммерция министрлігінің хабарламасында электромобильдерге қатысты «уағдаластықтардың мәні Еуроодақтың субсидияларға қарсы тергеуі аясында баға жөніндегі міндеттемелерді қарау рәсімі болып қала беретіні» айтылған. Алайда болашақ квоталардың нақты көлемі немесе тиісті тетіктерді енгізу мерзімдері көрсетілмеген.
2026 жылғы қаңтарда Еуроодақ компаниялардың ұсыныстарын қарау тәсілдерін айқындайтын баға жөніндегі міндеттемелерге қатысты жалпы нұсқаулық жариялады. Еуропалық тарап тиісті рәсімдерді, соның ішінде қатысушы өндірушілердің баға жөніндегі міндеттемелерін бағалауды және көзделген қайта қарау тетіктерін қолдануды жалғастырады. Осылайша, әңгіме Қытай электромобильдеріне қойылған сауда шектеулерін толық алып тастау туралы емес, дауды реттеудің келісілген рәсімін жалғастыру туралы болып отыр.
Қытай сондай-ақ ДСҰ ережелерінде көзделген құқықтарын, соның ішінде сауда дауларын шешу тетіктеріне жүгіну және белгіленген жағдайларда өтемақы талап ету құқығын сақтап қалуға ниетті екенін растады. ҚХР Коммерция министрлігінің пікірінше, қол жеткізілген өзара түсіністік сауда саласындағы қайшылықтардың одан әрі шиеленісуіне жол бермей, Қытай мен Еуроодақ арасындағы автомобиль саудасы үшін анағұрлым болжамды жағдайларды қамтамасыз етуге мүмкіндік берді.
