Қытай жолаушылар пойыздарын нөмірлеу жүйесін өзгертіп, ең жоғары пайдалану жылдамдығы сағатына 350 шақырымнан асатын құрамдарды жеке X санатына бөлмек. China State Railway Group корпорациясының хабарлауынша, жаңа ережелер 2026 жылғы қарашаның соңы мен желтоқсан айында кезең-кезеңімен күшіне енеді.
Өзгерістер жоғары жылдамдықты теміржол желісінің кеңеюіне және пойыздар санының артуына байланысты. 2014–2025 жылдар аралығында сағатына 300–350 шақырым жылдамдықпен жүруге арналған жоғары жылдамдықты пойыздар саны 209 пайызға, яғни 1018-ден 3149-ға дейін өсті. Соның нәтижесінде қолданыстағы нөмірлер диапазондары біртіндеп шекті деңгейіне жақындап келеді.
Реформадан кейін G санаты ең жоғары пайдалану жылдамдығы сағатына 350 шақырым болатын пойыздарды, T санаты сағатына 300 шақырым жылдамдықпен жүретін құрамдарды, ал K санаты сағатына 200–250 шақырым жылдамдықпен жүретін пойыздарды білдіреді. Жаңа X сериясы бұдан да жоғары жылдамдықты құрамдарға арналған. Бұл ретте қолданыстағы пойыздар қозғалысының кестесі өзгеріссіз қалады.
Жаңа жылдамдық санатына сәйкес келетін пойыздардың бірі Қытайдың «Фусин» сериясындағы CR450 пойызы болмақ. Оның сынақ кезіндегі ең жоғары жылдамдығы сағатына 450 шақырымға жетеді, ал жобалық пайдалану жылдамдығы сағатына 400 шақырымды құрайды. 2026 жылғы наурызға қарай пойыз барлық үлгілік сынақтардан өтті.
Қытай теміржол ғылымдары академиясының мәліметінше, CR450 пойызы сағатына 400 шақырым жылдамдықпен жүргенде әр шақырымға 22 кВт·сағ-тан аз электр энергиясын тұтынады. Салыстыру үшін, қазіргі уақытта сағатына 350 шақырым жылдамдықпен жүретін пойыздарда бұл көрсеткіш әр шақырымға 19,5–23,5 кВт·сағ аралығында.
Жоғары жылдамдықты теміржол қатынасын дамыту Қытайдың теміржол саласындағы 2026–2030 жылдарға арналған ғылыми-технологиялық инновациялар жоспарында да қарастырылған. Атап айтқанда, құжатта пойыздарды сағатына 400 шақырым жылдамдықпен пайдалану технологияларын әзірлеу және олардың мүмкіндіктерін іс жүзінде көрсету көзделген.
