Қытай парламентаралық диалогты кеңейтіп, халықаралық өзара іс-қимыл үшін құқықтық жағдайлар жасау арқылы басқа мемлекеттердің заң шығарушы органдарымен ынтымақтастықты жандандыруды көздеп отыр. Бұл туралы Бүкілқытайлық халық өкілдері жиналысы (БХӨЖ) Тұрақты комитетінің төрағасы Чжао Лэцзи Бейжіңде «Достық алмасулар жөніндегі заң шығарушылар форумы — 2026» қатысушыларымен кездесу барысында мәлімдеді.
Чжао Лэцзидің айтуынша, БХӨЖ шетелдік парламенттермен түрлі деңгейдегі байланыстарды дамытуға, Қытайдың төрт жаһандық бастамасын жүзеге асыруға және көпжақты ынтымақтастықты нығайтуға жәрдемдесуге дайын.
Қытай парламентінің басшысы сондай-ақ ҚХР-дың 2026–2030 жылдарға арналған әлеуметтік-экономикалық дамуының 15-бесжылдық жоспарының негізгі бағыттарын таныстырды. Ол Қытай экономикалық ашықтықты одан әрі кеңейтіп, шетелдік серіктестермен өзара іс-қимылды дамытуды жалғастыратынын атап өтті.
Кездесуге қатысушылар заң шығарушы органдар арасындағы диалогты нығайтуды, тәжірибе алмасуды және орнықты даму, халықаралық қауіпсіздік пен экономикалық ынтымақтастық мәселелері бойынша бірлескен жұмысты қолдайтындарын білдірді. Форумның өзі 13 қазанда Тяньцзинь қаласында өтті. Оған бес құрлықтағы 52 елдің, өңірдің және халықаралық ұйымның қазіргі және бұрынғы 66 парламент мүшесі, сондай-ақ Қытайдың әртүрлі деңгейдегі заң шығарушы органдарының 27 депутаты қатысты.
Талқылаулардың негізгі тақырыптары жергілікті басқару, әлеуметтік тұрақтылық, өнеркәсіп пен білім беру салаларының өзара іс-қимылы, инновациялық өндірістерді дамыту, мәдени мұраны сақтау, қалалық инфрақұрылымды жаңарту және экологиялық саясат мәселелері болды.
