Қытай 2025 жылы ғылыми зерттеулер мен әзірлемелерге 3,93 трлн юань (шамамен 584,5 млрд АҚШ доллары) бөлді. Бұл алдыңғы жылмен салыстырғанда 8,2 пайызға көп. ҚХР Мемлекеттік статистика басқармасының хабарлауынша, барлық шығынның төрттен үш бөлігінен астамын кәсіпорындар қаржыландырған.
14-бесжылдық кезеңінде (2021–2025 жылдар) Қытайдың ғылыми-зерттеу және тәжірибелік-конструкторлық жұмыстарға (ҒЗТКЖ) жұмсаған шығындары жыл сайын орта есеппен 10 пайызға өсіп отырды. Бұл салаға салынған инвестиция көлемі бойынша ел әлемде екінші орында тұр.
Қытайдың жалпы ішкі өніміндегі ҒЗТКЖ шығындарының үлесі 2,8 пайызға жетіп, бір жыл ішінде 0,11 пайыздық тармаққа ұлғайды. Бұл көрсеткіш алғаш рет Экономикалық ынтымақтастық және даму ұйымына (ЭЫДҰ) мүше елдердің орташа деңгейінен (2,72 пайыз) асып түсті. Ғылыми зерттеулердің қарқындылығы бойынша Қытай әлемде 12-орынға ие болды.
Ең жоғары өсім қарқыны іргелі зерттеулер саласында тіркелді. Оларға жұмсалған шығын 13,3 пайызға артып, 283,46 млрд юаньға жетті. Қолданбалы зерттеулерді қаржыландыру 3,2 пайызға өсіп, 444,16 млрд юаньды, ал тәжірибелік-конструкторлық әзірлемелерге жұмсалған шығын 8,4 пайызға ұлғайып, 3,2 трлн юаньды құрады.
Қытай кәсіпорындарының ҒЗТКЖ-ға жұмсаған шығындары алғаш рет 3 трлн юаньнан асты. Ғылыми зерттеулер мен әзірлемелерді қаржыландырудың жалпы көлеміндегі бизнес үлесі 77,4 пайызды құрады.
Статистика ведомствосының мәліметінше, ҒЗТКЖ шығындарының жиынтық өсімінің 73,7 пайызын кәсіпорындар қамтамасыз етті. Сонымен қатар ғылыми зерттеулерді қаржыландырудағы бизнес үлесі төртінші жыл қатарынан 77 пайыздан жоғары деңгейде сақталып отыр.
