Қытайдың Шэньчжэнь қаласында 17–18 қарашада еркін сауданы, цифрлық экономиканы, жасанды интеллектті және өңірлік ынтымақтастықты дамытуға арналған АТЭС-2026 іскерлік саммиті өтеді.
Іс-шараға Азия-Тынық мұхиты экономикалық ынтымақтастығына (АТЭС) мүше бірқатар экономикалардың басшылары мен бизнес өкілдері қатысады. Саммитті Қытайдың халықаралық сауданы дамытуға жәрдемдесу комитеті (ҚХСДЖК) ұйымдастырады.
Талқылаулардың негізгі тақырыптары — Азия-Тынық мұхиты өңірінде еркін сауда аймағын құру, өндірістік тізбектерді нығайту, цифрлық технологиялар мен орнықты экономиканы дамыту.
2026 жылы АТЭС-ке төрағалық ететін Қытай ашықтықты, инновацияларды және ынтымақтастықты өңірлік күн тәртібінің басты басымдықтары ретінде айқындады.
Малайзиядағы Қытай сауда-өнеркәсіп палаталары қауымдастығының төрағасы Нг Йих Пинг саммит сауда рәсімдерін жеңілдетуге, трансшекаралық бизнес шығындарын азайтуға және технологиялық ынтымақтастықты кеңейтуге ықпал етеді деген үмітін білдірді.
Panasonic Holdings Corporation өкілі Масахару Накаяма өңірлік жеткізу тізбектерін біріктірудің және жасанды интеллект пен цифрлық экономиканы қоса алғанда, жаңа бағыттарды бірлесіп игерудің маңыздылығын атап өтті.
ҚХСДЖК төрағасы Жэнь Хунбиньнің айтуынша, кездесу қорытындысы бойынша өңірдегі іскерлік байланыстарды нығайтуға бағытталған Шэньчжэнь бастамасын жариялау жоспарланып отыр.
АТЭС іскерлік саммиті 1996 жылдан бері жыл сайын өткізіліп келеді және Азия-Тынық мұхиты өңірі елдерінің үкіметтері мен бизнес өкілдерін біріктіреді.
