Қытайдың Sany автокөлік өндірушісі Замбияда электр қуатымен жүретін коммерциялық жүк көліктерін таныстырды. Компания жүк тасымалы нарығындағы жаңа сегментті игеруді және елдің экологиялық таза көлікке көшуін қолдауды көздеп отыр.
Таныстырылым ел астанасы Лусакада өтті. Техниканы нарыққа шығару және сатумен Sany стратегиялық серіктестік орнатқан жергілікті Pilatus Engineering Company Limited компаниясы айналысады.
Қытайлық өндірушінің өкілі Ван Чао бұл ынтымақтастық компанияға қолданыстағы дилерлік желіні пайдалануға және Замбия нарығындағы орнын нығайтуға мүмкіндік беретінін атап өтті.
Оның айтуынша, қажетті қуаттау инфрақұрылымы мен қолайлы пайдалану жағдайлары болған кезде электр жүк көліктері дизель отынымен жүретін көліктерге экономикалық тұрғыдан тиімді балама бола алады.
Замбияның Инфрақұрылым және қала құрылысы министрі Коллинз Нзову Sany компаниясының нарыққа шығуын құптап, электр жүк көліктерін енгізу пайдалану шығындарын азайтуға және экологиялық таза көліктің дамуын жеделдетуге көмектесетінін атап өтті.
Министр сондай-ақ үкіметтің қуаттау инфрақұрылымын құруға қолдау көрсетуге дайын екенін растады.
Қытайлық өндірушінің жергілікті серіктесі Sany техникасына арналған мамандандырылған көрме залын ашуды, онлайн сату платформасын іске қосуды және жүк көліктеріне техникалық қызмет көрсететін сервистік орталық ұйымдастыруды жоспарлап отыр.
Sany компаниясы замбиялық кәсіпорындармен ынтымақтастық ел нарығында ұзақ мерзімді жұмыс істеуге мүмкіндік беріп, елде электр қуатымен жүретін коммерциялық көліктерді пайдалану аясын кеңейтеді деп үміттенеді.
