Қытайдың тұрғындардың мүдделерін ескере отырып, қалалық ортаны жаңғырту тәжірибесі басқа елдер үшін пайдалы болуы мүмкін. Бұл туралы БҰҰ Бас хатшысының орынбасары, БҰҰ-ның Елді мекендер жөніндегі бағдарламасының (БҰҰ-Хабитат) атқарушы директоры Анаклаудия Россбах Фучжоу қаласында Дүниежүзілік қалалар күніне орай өткен іс-шараларда мәлімдеді.
Оның айтуынша, Қытай тұрғын үй аудандарын қайта жаңғыртуды тарихи мұраны сақтаумен, инфрақұрылымды дамытумен және жайлы қоғамдық кеңістіктер құрумен ұштастырып келеді. Бұл ретте балалардың, егде жастағы адамдардың және мүгедектігі бар азаматтардың қажеттіліктеріне ерекше назар аударылады.
2026–2030 жылдарға арналған ұлттық жоспарға сәйкес, Қытай 115 мың ескі тұрғын үй кешенін қайта жаңғыртуды, 575 мың лифтіні жаңартуды немесе жаңадан орнатуды, сондай-ақ 50 мың гектар қалалық жасыл аймақ құруды немесе абаттандыруды жоспарлап отыр.
Россбах лайықты тұрғын үй жағдайларын қамтамасыз ету тек үй салумен шектелмейтінін атап өтті. Көлік пен қоғамдық қызметтердің қолжетімділігі, климаттың өзгеруіне төзімділік және жергілікті қауымдастықтардың қалалық жоспарлауға қатысуы да маңызды.
БҰҰ-Хабитаттың «Әлем қалалары — 2026» баяндамасына сәйкес, әлемде 3,4 млрд-қа дейін адам сенімді, қауіпсіз әрі лайықты тұрғын үйге қол жеткізе алмай отыр. Олардың ішінде 1 млрд-тан астам адам бейресми қоныстар мен қараусыз қалған, инфрақұрылымы нашар аудандарда тұрады.
