Дүниежүзілік сауда ұйымының штаб-пәтерінде ДСҰ Бас кеңесінің шешімі бойынша Қазақстан Республикасының ДСҰ жанындағы Тұрақты өкілі Қайрат Төребаев Сауда саясатын шолу органының төрағасы қызметіне ресми түрде кірісті, деп хабарлайды DKnews.kz.
Сауда саясатын шолу органы – Бас кеңеспен және Дауларды шешу органымен бірге ДСҰ-ның үш негізгі органының бірі. Оның негізгі міндеті – ДСҰ-ның барлық мүшелерінің сауда саясатын үнемі талдау және талқылау арқылы халықаралық саудадағы ашықтықты қамтамасыз ету.
Қазақстанның ұйымға мүше болу тарихында тұңғыш рет оның өкілі осындай жоғары құрылымды басқарды. Сонымен қатар Қазақстан жаһандық сауда реттеудің осы негізгі тетігін басқарған ТМД мемлекеттерінің ішінен бірінші ел болды.
Бұл тағайындау Қазақстанның ДСҰ-ның белсенді және сындарлы қатысушысы ретіндегі беделін маңызды тану, халықаралық сауда қоғамдастығы тарапынан жоғары сенім деңгейін көрсетеді және еліміздің ашық, инклюзивті және әділ көпжақты сауда жүйесін дамытуға тұрақты үлесін растайды.
Өзінің кіріспе сөзінде Қ.Торебаев алдыңғы төрағаға атқарған еңбегі мен Орган жұмысының тиімділігіне қосқан үлесі үшін алғыс білдірді. Ол төраға ретіндегі міндеттерін жоғары жауапкершілікпен атқаруға және ДСҰ мүшелері арасында сындарлы диалогты нығайтуға дайын екенін растады.
2024 жылғы қыркүйекте Женевада Қазақстанның ДСҰ-ға қосылған сәттен бергі алғашқы Сауда саясатын шолу рәсімі өтті. Бұл шолу Қазақстанның жетістіктерін халықаралық деңгейде таныстыру алаңы болды. Халықаралық серіктестер елдің экономиканы әртараптандыру және сауда рәсімдерін оңайлату салаларындағы жетістіктерін жоғары бағалап, Қазақстанның сенімді сауда серіктесі ретіндегі беделін тағы бір мәрте растады.
