БҰҰ-ның Қоршаған ортаны қорғау бағдарламасының басшысы Қазақстанның тұрақты даму және экология саласындағы бастамаларын жоғары бағалады, деп хабарлайды DKNews.kz.
БҰҰ-ның Қоршаған ортаны қорғау жөніндегі бағдарламасы штаб-пәтерінде Қазақстанның Кениядағы Елшісі, ҚР Найробидегі БҰҰ бөлімшесі жанындағы Тұрақты өкілі Барлыбай Садықовтың БҰҰ Бас хатшысының орынбасары – БҰҰ Қоршаған орта жөніндегі бағдарламасының (ЮНЕП) Атқарушы директоры Ингер Андерсенмен кездесу өтті.
Кездесу барысында Елші сұхбаттасын Қазақстанның қоршаған ортаны қорғау және климаттың өзгеруінің салдарын еңсеру саласында ұлттық, өңірлік және халықаралық деңгейде қабылдап жатқан шаралары туралы хабардар етті. «Таза Қазақстан» бастамасы, Қазақстандағы биоәртүрлілікті сақтау шаралары, Каспий және Арал теңіздерінің, су ресурстарының проблемаларын шешу, халықаралық форумдар мен бастамаларға қатысу, оның ішінде «One Water Vision» іс-шарасы және т.б. Қоршаған ортаны қорғау және климаттың өзгеруінің салдарын еңсеру Қазақстанның ішкі және сыртқы саясатындағы басым бағыттардың бірі, Астананың халықаралық серіктестерімен, соның ішінде БҰҰ-мен әрқашан белсенді өзара іс-қимыл атқарып, теңдестірілген шешімдерді тауып, экология саласында тиімді шаралар қабылданатыны аталып өтті.
Тараптар Қазақстан мен ЮНЕП арасындағы өзара іс-қимылдың өзекті мәселелерін, қоршаған ортаны қорғау саласындағы ынтымақтастықты дамыту жоспарларын, сондай-ақ қазақстандық делегацияның ЮНЕП өткізетін іс-шараларға қатысу мәселелерін талқылады.
ҚР Президенті Қасым-Жомарт Тоқаевтың бастамасымен 2026 жылы Астанада өтетін Өңірлік экологиялық саммитті (ӨЭК) дайындау және өткізу кезінде ЮНЕП-пен өзара іс-қимыл мәселелерін талқылауға ерекше назар аударылды. Саммитке дайындық, оның ішінде ӨЭК барысында қабылдануы жоспарланған бірқатар құжаттар жобалары мен өңірлік бастамаларды әзірлеу бойынша тығыз ынтымақтастық туралы келісімге қол жеткізілді.
Сонымен қатар Қазақстан делегациясының 2025 жылғы желтоқсанда Найробиде өтетін БҰҰ Қоршаған ортаны қорғау Ассамблеясының 7-ші сессиясына қатысуы және осы Ассамблея аясында «Су, климат және қоршаған ортаның тұрақтылығы» тақырыбындағы ҚР іс-шарасын өткізу мәселелері талқыланды.
И. Андерсен Қазақстанның қоршаған ортаны қорғау мәселелерін шешудегі күш-жігері мен бастамаларын жоғары бағалап, қазақстандық тараптың ЮНЕП іс-шараларына деген қолдауы үшін ризашылығын білдіріп, ЮНЕП Қазақстан Республикасының экология және тұрақты даму саласындағы бастамалары мен жобаларын іске асыруда сараптамалық көмек көрсетуге дайын екенін мәлімдеді.
Кездесу қорытындысы бойынша қоршаған ортаны қорғау саласындағы өзара мүдделі мәселелер бойынша ынтымақтастықты жалғастыру, экологиялық жобаларды іске асыруға қолдау көрсету және түрлі деңгейдегі іс-шараларды өткізу туралы келісімге қол жеткізіліп, Қазақстан мен БҰҰ Қоршаған ортаны қорғау бағдарламасы арасындағы ынтымақтастықты кеңейту бойынша бірлескен шараларды қарастыруға әзірлік білдірілді.
